November, 2021

По огромна борба и натпревар полн со пресврти, Немилосрдни вчеравечер (29.11.2021) успеаја барем да го подзапрат победничкиот налет на Бутоп играјќи нерешено 8-8. Со ова, иако не е продолжена победничката серија, продолжува непобедливоста на сините во низа од седум средби. Бутопци играа без класичен голман и со двајца дебитанти во составот, Нео и Фичо, играше и Даниел, а од поискусните тука беа Велковски, Димитровски и Смиљковски. Овој комбиниран состав мораше контролата на играта и диктирањето на темпото да им ги остави на противникот, но не недостасуваше борбеност кај нашите момци кои и покрај негативата од три гола дојдоа до израмнување на пет минути пред крајот. Натпреварот се одигра во балонот кај ОУ Рајко Жинзифов со почеток во 20:00 часот.

Бутоп денес (29.11.2021) ќе се обиде да дојде до седмата победа по ред, во натпреварот со Немилосрдни кој се игра во балонот кај ОУ Рајко Жинзифов во Топанско, од 20:00 часот. Во составот за денешната средба има три измени во поглед на минатонеделниот. Повторно ќе настапат Велковски, Димитровски и Смиљковски, а покрај нив ќе бидат Даниел, на голот Марко Стојчевски, како и уште еден дебитант.

Тековната победничка серија од шест победи по ред не натера да ги разгледаме историските книги и рекорди. Во својата богата историја Бутоп има две серии од по десет последователни победи и тоа е се уште нашиот рекорд. Првата ваква низа е остварена во периодот 19 јануари – 11 октомври 2008, а втората од 26 септември до 26 декември 2009 година. Интересно е што во календарската 2012 година сме имале една серија од осум победи и уште една од седум, раздвоени со само еден пораз од тимот на Автокоманда. Од поновата историја ја паметиме серијата од седум триумфи на почетокот на 2016 година кога игравме термини со екипите на Албион Север и Мојсовски-Џезо. Инаку, најдолгата серија без пораз ни е од периодот 27 ноември 2008 -13 август 2009 година, кога не бевме поразени на четиринаесет натпревари по ред. Се надеваме дека победничката низа која ја имаме во моментов ќе продолжи и ќе влезе во овие историски записи.

Бутоп вчеравечер (22.11.2021) ја продолжи победничката серија откако со конечни 11-9 беше подобар од тимот на Немилосрдни. Во натпревар со многу пресврти и голови, не успевавме да воспоставиме контрола и неизвесноста траеше до последната минута. Сепак, повторно нашето искуство беше пресудно на крајот. Средбата се одигра во балонот кај ОУ Рајко Жинзифов во Топанско со почеток во 20:00 часот, а настапија играчите кои ги најавивме вчера.

Може ли вечерва (22.11.2021) да заврши серијата од пет победи во која се наоѓа Бутоп ќе дознаеме околу 21:00 часот кога ќе заврши натпреварот против Немилосрдни. Повторно играме на друго игралиште, овојпат во балонот кај ОУ Рајко Жинзифов во Топанско поле. Младите момци предводени од Ристе Валчанов ќе се обидат да најдат лек за сините. Ние ќе истрчаме со супер искусен состав, засилени со Димитровски кој се врати од Софија. Покрај него во тимот ќе се најдат Костовски, Смиљковски, Курт, Велковски и Каравидов.

Минатата недела (14.11.2021) репрезентацијата на Македонија ја оствари една од најважните победи во својата историја совладувајќи го Исланд со 3-1 на Националната арена Тодор Проески во Скопје. Овој резултат ја доведе А-селекцијата во баражот за Светското првенство во Катар, кој ќе се одржи идниот петок (26.11) во Цирих. Стрелец на двата одлучувачки гола во второто полувреме беше нашиот Елиф Елмас, кој продолжува во најдобро светло да го претставува бутелскиот фудбал во светот.

Бутоп продолжува да гази и вчера ја оствари петтата победа по ред. Дарко ФФМ повторно беа немоќни да ја сопрат расположената сина дружина, па конечните 5-4 можеби не ја даваат реалната слика за натпреварот во кој ние ја имавме контролата и врз играта и врз резултатот. Нашата стартна шесторка беше: Грмуш, Курт, Велковски, Смиљковски, Каравидов и Костовски. Ваква искусна постава не сме имале одамна, па момците рутински ја завршија домашната задача потпомогнати од Валчанов кој подоцна влезе во игра.

Бутоп вечер (15.11.2021) од 19:00 часот повторно ќе одигра натпревар со тимот на Дарко Видиниќ и повторно на нов терен. Овојпат местото на средбата е балонот кај ОУ Круме Кепески во Кисела Вода. Ние по подолго време ќе истрчаме со искусен тим, составен од старите волци: Грмуш на голот, Курт, Велковски, Смиљковски, Костовски, Каравидов, Сезаир и младиот Валчанов.

Ниту студеното време и лизгавите терени на СУГС „Никола Карев“ не го спречија Бутоп да слави нова победа над Дарко ФФМ на синоќешниот (11.11.2021) натпревар. Конечни 9-7 во средбата која започна во 22:30 на помошниот терен, а своето второ полувреме го имаше на главниот од двата терена кај Карев. Нашите момци одиграа солидно, иако со одредени падови во играта и грешки. Сепак доволно за нова победа. Настапија играчите кои ги најавивме вчера освен Матеј, а на голот се менуваа Костовски, Курт и Каравидов.

Бутоп вечерва (11.11.2021) за првпат ќе игра на теренот кај СУГС „Никола Карев“ против старите познаници Дарко ФФМ. Натпреварот почнува во 22:00 часот. Во нашиот состав денес ќе се најдат: Матеј, Костовски, Валчанов, Курт, Велковски, Каравидов и Даниел.