April, 2020

ФК Бутоп на сите православни верници им го честита најголемиот христијански празник Велигден. Ви посакуваме здравје, мир и благосостојба. Христос воскресе!

Почитувани,

Пандемијата на коронавирусот донесе многу поместувања во светот на спортот, а не не заобиколи ни нас. Повеќе од јасно е дека и ФК Бутоп трпи од оваа ситуација, но немаме намера да се откажеме. Вести во 6 точки:

• Здравјето како врвен приоритет. Тоа јасно го покажавме уште на почетокот на пандемијата. Нашите фудбалери се придржуваат до пропишаните мерки.
• „Кота 14“ повторно наша врвна цел. Навистина не ни помислувавме дека сезонава може да биде доведено во прашање исполнувањето на Кота 14, но ете, во моментов сме заглавени на 13 одиграни натпревари. До крајот на јуни уште барем еден меч? Ќе го одиграме.
• Проекцијата недостижна. Нашите планови велеа дека сезонава можеме да дојдеме и до 25 одиграни натпревари, но тоа се чини е невозможно.
• Новата гарнитура ќе доцни. За жал повторно мораме да го пролонгираме претставувањето на новите дресови. Подготовката и финансиската конструкција беа речиси пред крај и презентацијата требаше да биде најдоцна до крајот на мај. Сепак ќе мора да почекаме уште малку.
• Ќе почекаат и Кико и Коки. А, за влез во клубот 100 ќе мора да се стрпат Велковски и Колев. Двајцата се со по 98 настапи.
• Индивидуален тренинг. Нашите фудбалери многу добро знаат што значи тоа „индивидуален тренинг“. Тоа е една од специјалностите на Бутоп. Затоа, немаме сомнежи дека кога сето ова ќе заврши, ние ќе бидеме во предност во однос на другите екипи.

Во период кога повеќето луѓе и спортисти мора да останат дома поради пандемијата на корона вирусот пристигаат пораки и идеи од сите страни за тоа како да се однесуваме во овој своевиден карантин. Разговаравме со нашиот голман Грмуш и го замоливме да упати порака до нашите фанови и јавноста во целост. Не се мислеше многу: „Бранете се од корона ко Грмуш меѓу стативи!“ – започна во свој стил. Потоа во нешто посериозен тон продолжи: „И јас постојано сум дома. Физичката форма ја одржувам со некои, да ги наречам, домашни вежби. Се фокусирам на здравјето и пробувам да го зајакнам имунитетот. Едноставно, сите сме заедно во битката со болеста!“ – беше краток и јасен популарниот Грмуш.