АКТУЕЛНОСТИ

Бутоп оствари убедлива победа (5-10) на вчерашниот натпревар против Ак. Ќерим во рамките на осмото коло на МЛ. Нашите момци беа расположени за фудбал и покажаа класа за трета победа по ред. Триумфот не беше доведен во прашање во ниеден момент. Индивидуално се истакна Вангеловски со шесте погодоци, а хет-трик постигна Велковски. Курт застана на голот, Димитровски постигна еден погодок, а во тимот беа уште и Костовски, Волчевски и Чаковски.

Вечерва на програмата во вонреден, неделен термин е осмото коло од МЛ во кое Бутоп се среќава со Ак. Ќерим. Токму на првиот натпревар со нив од оваа Сезона 4 во маалската конкуренција започна нашиот подем во формата откако славевме со 6-4 и ги освоивме првите три бода по стартните порази од Лукс кафе и АММ-Тим. Сега се наоѓаме во сосема спротивна ситуација, како трети на табелата, па евентуална победа вечерва може речиси да ни го обезбеди подиумот на крајот од сезоната. Вечерашната средба започнува во 19:45.

Фудбалерите на Бутоп во четвртокот (11.4.2024) остварија нова победа во Маалската лига и докажаа дека се наоѓаат во супер форма во вистинско време остварувајќи четири победи на последните пет натпревари во изминатите триесетина дена. Последнава, иако минимална (6-5) против АММ-Тим, е од огромно значење затоа што го зацврсти нашиот тим на третото место на табелата пред финишот на Сезона 4. Конечниот резултат сепак не ја отсликува вистинската ситуација на теренот бидејќи нашите момци имаа потполна контрола и високо водство во поголемиот дел од средбата. Па така, од 5-1 на седум минути пред крајот, единствено нашето опуштање беше причината за овој минимален триумф. На голот на Бутоп по долго време се најде Ристе Кичовски, први настапи во ова издание на МЛ имаа и Костовски и Велковски (кој со четири гола беше најефикасен), а настапија и Димитровски, Курт, Смиљковски, Чаковски и Волчевски. Веќе утре во вонреден, неделен термин на програмата е осмото коло и натпреварот со Ак. Ќерим.

Низ својата историја Бутоп многу често се обидуваше да наоѓа ривалства со слични на себе, односно со екипи кои негуваат маалски карактер. Ќе се потсетиме на едно такво старо и подзаборавено ривалство против една аеродромска екипа. На денешен ден пред точно петнаесет години (11.04.2009) го одигравме првиот од двата натпревари против тогашните МК Рисови, кои денес го носат името ТимАската. Натпреварот се одигра на теренчето кое кај локалното население во Аеродром е познато како „Тере“ со почеток во 18:00 часот. За Бутоп тогаш играа Фекиќ, Димитровски, Курт, Смиљковски, Костовски, Каравидов и Сезаир. На жешкото гостување овој наш, своевремено дрим тим, оствари победа со конечни 10-7 откако на полувреме беше нерешено, 5-5.

Лидери во одбраната на ТимАската уште во тој период беа Паста, Флека и Кипри, на голот – Емил, додека во офанзивата предничат Васе и Јуп. Неизоставен дел од овој тим се и Столе и Мали. Разбирливо за аеродромска екипа е важно да се спомене и водачот на публиката, Хари. За овој натпревар конкретно, нашите ривали секогаш потенцираат дека причината за нивниот пораз е тоа што „во натпреварот влегле потценувачки кон нас без никаква тактичка анализа, лежејќи под клима десет минути пред натпреварот.“ За разлика од нив, ние сме пристигнале „со точаци, загреани за фудбал“.

Откако минатата недела им се реванширавме на Лукс кафе за поразот од првото коло сега на ред за една мала одмазда ни е АММ-Тим. Вечерва од 20:00 часот овој натпревар ќе го отвори седмото коло во кое ние влегуваме како третопласирани со девет бодови, а нашиот противник со три бода помалку е петти на табелата. Во второто коло АММ беа поуспешни со конечни 7-4. Денес за Бутоп ќе настапат: Кичовски, Курт, Димитровски, Смиљковски, Чаковски, Волчевски, Велковски и Костовски.

ФК Бутоп им го честита денешниот празник Рамазан Бајрам на сите муслимани во Македонија со желби за здравје и благосостојба. За многу години!

Дербито на Маалската лига меѓу Бутоп и Лукс кафе одиграно завчера (4.4.2024) заврши во наша корист со конечни 6-3. Куриозитет е тоа што во второто коло чаирчани беа подобри од нас со идентичниот резултат, па ние сега вративме подеднакво. Првото полувреме беше израмнето и екипите го менуваа водството се до две-три минути пред крајот кога бутопци поведоа со 4-3. Во второто полувреме нашите момци одиграа фантастична одбрана затворајќи ги сите приоди кон голот на Колев и со две полуконтри го казнија противникот. Овие три бода ќе бидат мошне значајни во нашата борба за подиум на крајот од оваа Сезона 4, а во моментот сме осамени на третата позиција со три бода помалку од Лукс кафе и два повеќе од Ак. Ќерим.

Како се доближува часот на вечерашната пресметка со Лукс кафе (21:00 часот) така се вжештува атмосферата во таборот на Бутоп. Голем е интересот за денешниот натпревар особено кога ќе се погледне моменталната табела, каде ние како третопласирани го напаѓаме тимот кој е едно место над нас. Токму затоа не треба да чуди фактот што дури осум наши играчи се пријавени во протоколот за денешниот дуел: Колев, Димитровски, Курт, Вучевски, Волчевски, Чаковски, Смиљковски и Вангеловски.

Утре (4.4.2024) почнува вториот дел од четвртата сезона на Маалската лига, а бутопци му излегуваат на мегдан на добро познатиот ривал, екипата на Лукс кафе (21:00 часот). Чаирчани беа подобри од нас во првото коло победувајќи со 6-3. Се чини дека утрешната средба освен можност за реванш претставува шанса со евентуална победа да добиеме многу во борбата за првите три места, додека пак пораз не би бил некаква трагедија затоа што повторно ќе имаме се во свои раце во преостанатиот дел од сезоната. Бутоп и Лукс кафе досега се среќаваа шест пати, а ние имаме негативен биланс од две победи и четири порази.

На точно половина од Сезона 4 на Маалската лига, Бутоп се наоѓа на третата позиција на табелата со две победи и три порази. Подобрата гол разлика од АММ-Тим е причината што сме едно место над нив, но блиску до нас се и Ак. Ќерим со четири, односно Алиенс со три освоени бода. Битката за титулата според досега прикажаното би требало да се води меѓу Албајрак Тенда и Лукс кафе. Повеќе од јасно е дека ако сакаме и на крајот да се најдеме меѓу трите најдобри ќе мора дополнително да го кренеме нивото на игра и да освоиме повеќе бодови во возвратните дуели со нашите противници. Вториот дел од оваа сезона почнува веќе в четврток кога играме против Лукс кафе. Во првото коло загубивме 6-3, па ова е шанса да се реваншираме за тој пораз. Кај индивидуалната статистика вреди да се спомне Вангеловски кој со девет погодоци е трет на листата на стрелците и може да се вмеша во борбата за признанието најдобар стрелец кое веќе еднаш го освои во премиерното издание на Маалската лига во есента 2022 година.