February, 2023

Бутопци се наоѓаат пред уште еден тежок испит во третото коло од Маалската лига. Противник е тимот на ФЦ Мајами кој досега има максимален учинок два од два и според прикажаното важи за еден од трите главни фаворити за освојување на лигата. Дали и колку ќе можат да парираат нашите момци ќе видиме во четврток (2 март) од 19:00 часот за кога е закажан почетокот на овој натпревар.

Бутоп загуби убедливо на вчерашниот натпревар против Љуботенски пат во рамките на второто коло на Маалската лига. Конечните 11-4 не ја даваат комплетната слика на случувањата на теренот затоа што бутопци беа рамноправен ривал во првото полувреме кое заврши со минимална предност (4-3) на противникот. Сепак, второто полувреме донесе пад во нашата игра и многу грешки кои беа прецизно казнети. На крајот сосема заслужена победа за Љуботенски пат. Бутоп и во ова коло настапи со идентичен состав како и во првото: Костовски, Курт, Димитровски, Смиљковски, Каравидов, Велковски и Валчанов.

Изминатите неколку дена Бутоп ги разгледуваше опциите како да го продлабочи и засили својот ростер за настапите во Маалската лига. Одлучено беше да се оди со проверени сили, па лесно успеавме да се договориме со Марко Шмитиќ и браќата Амар и Анес Вукељ. Сите тројца настапуваа за Бутоп и есеноска во првата сезона на ова натпреварување и сега очекуваме нова успешна соработка. Освежување за нас е и Валчанов кој беше во Холандија и настапи само еднаш во есенскиот дел, а минатиот четврток со два гола го предводеше тимот во дербито со Сент Патрик. Ако се земе предвид и тоа дека Вангеловски треба да се врати од повредата некаде по третото коло, амбициите на Бутоп сигурно ќе пораснат и ќе бидат борба за влез во плејофот и распределба на пехарите.

Бутоп за свој ривал во второто коло на Маалската лига кое е на програмата наредниот четврток (23.02.2023) ќе го има тимот на Љуботенски пат. Натпреварот ќе започне во 19:00 часот и е прв на програмата таа вечер. Нашиот противник е еден од фаворитите во оваа втора сезона, која ја отвори со пораз од уште еден фаворит – ФЦ Мајами.

Вчеравечер Бутоп ремизираше на отварањето на втората сезона на Маалската лига откако тврдиот и неизвесен натпревар против локалниот ривал Сент Патрик заврши со конечни 3-3. Од самиот почеток се виде дека ова ќе биде уште едно тактичко надмудрување на старите познаници. Двете екипи беа еднакво близу до победата па се чини ова беше најреалниот исход. Кај Бутоп Костовски беше на голот, а во поле настапија Курт, Димитровски, Велковски, Смиљковски, Валчанов и Каравидов.

На останатите средби Лукс кафе со огромен напор и пресврт во последните минути беше подобар од Каќ (10-6), ФЦ Мајами го совлада Љуботенски пат (10-8), а Алиенс беше подобар од Барбер шоп Енис со 7-4.

Маалската лига се враќа на распоредот од утре (16.02.2023) кога почнува нејзиното второ издание. Ждрепката беше извршена вчера, а бутопци во првото коло за противник го добија стариот познаник и локален ривал, момците од ЗОО Арт (Сент Патрик), но бидејќи се уште преговараат за името и составот на тимот, точната информација ќе ја имаме утре. Уште три од тимовите треба да го објават официјалното име, па тогаш ќе го знаеме распоредот до крајот. Како што беше најавено, лигата се прошири на осум екипи па секој четврток љубителите на фудбалот ќе може да проследат по четири натпревари со термини од 19:00, 19:50, 20:40 и 21:30 часот.

Денес својот триесетти роденден го слави Кристијан Каравидов. Каро е легенда на клубот и негов член од самите почетоци. Три пати ја освојуваше златната копачка на Бутоп (2012/2013, 2020/2021, 2021/2022) и досега запиша 297 настапи. Му посакуваме уште многу успеси и рекорди. Среќен роденден Каро!

Денес својот роденден го слави Филип Пејков – Пинки. Тој во два наврати беше наш голман на сезоната, во 2009/2010 и 2010/2011. Собра вкупно 64 настапи за Бутоп. Со него во тимот беа остварени многу успеси во почетните години на нашиот клуб. Му посакуваме се најубаво!

Среќен роденден Пинки!

Следи деталниот преглед на бројот на настапи и погодоци на шеснаесетте играчи кои настапија за Бутоп во првата сезона на Маалската лига:

Бутопци денес ги завршија базичните зимски подготовки за оваа 2023 година, по тринаесетти пат откако со оваа традиција почнавме во 2011 година. Поголемиот дел од овие дваесет и пет дена играчите тренираа индивидуално. Остануваат десетина дена до почетокот на втората сезона на Маалската лига кога ќе видиме дали недостатокот на натпревари ќе влијае на резултатите, но во секој случај физичката издржливост не би требало да затаи.