September, 2024

Вчерашниот ден беше најсреќен за нашиот Анел Курт кој стапувајќи во брак ја круниса љубовта со својата избраничка Елма. ФК Бутоп на младенците им посакува долг и благословен заеднички живот исполнет со многу љубов.

Бутоп со пораз ја започна новата сезона во Маалската лига откако Лукс кафе беше подобар од нашите момци со 7-5. А почетокот ветуваше сосема поинаков расплет затоа што по десетина минути имавме водство од 4-0. Сепак, противникот почна да се враќа во игра и до средината на второто полувреме направи огромен пресврт и поведе 5-4. Ние возвративме со гол за ново израмнување и во моментите кога тргнавме по трите бода бевме казнети по една полуконтра. До крајот примивме уште еден гол за конечните 7-5. Една од причините за нашиот пад во второто полувреме веројатно беше и фактот што игравме без измена, но и без вистински голман поради недоаѓањето на Бесим Кики, па Смиљковски покри на таа позиција. Во поле играа Чаковски, Волчевски, Вучевски, Костовски и Џон.

По четврти пат во пет сезони првиот натпревар во Маалската лига е дербито меѓу двете основачки екипи на ова натпреварување, Бутоп и Лукс кафе. Вечерва во 21:00 часот на вообичаеното место – балонот кај ОУ „Рајко Жинзифов“ во Топанско поле се крева завесата на Сезона 5 на Маалската лига помеѓу двата тима за кои ова е деветти меѓусебен дуел. Лукс кафе се поуспешни од нас со пет победи наспроти три наши. Последната средба ја имавме пред точно една недела во генералката пред новата сезона во МЛ кога загубивме со конечни 9-7. Вечерва за нас ќе настапат Бесим Кики, за кого се надеваме дека ќе успееме да го договориме за целата сезона, Чаковски, Волчевски, Вучевски, Смиљковски, Костовски и Никола Џон.

Маалската лига денес ги објави имињата на шесте екипи кои ќе се борат за титулата во петтата сезона на натпреварувањето. Освен Бутоп, Алиенс и Лукс кафе кои се дел од МЛ од самото нејзино формирање во новата сезона ќе има и три дебитанти: Галактикос Тим, Интер Балкан и Шкупи старс. Објавен е и распоредот за првото коло во кое ние ќе се сретнеме со Лукс кафе, но за ова повеќе ќе прочитате утре.

Новата сезона на Маалската лига вчера беше најавена на официјалниот фејсбук профил на ова натпреварување. Сезона 5 ќе започне в четврток, 26 септември и вообичаено ќе се игра во четвртоците во балонот кај ОУ Рајко Жинзифов во Топанско поле. Вчера беше презентирано и новото модернизирано лого, а наредниве денови ќе се објават повеќе детали за екипите како и правилникот. Бутоп минатата сезона заврши на третото место, па сега се надева на нов успех и борба за самиот врв.

Бутоп запиша пораз (7-9) во вчерашната средба со момците од Лукс кафе. Натпреварот беше израмнет од почеток до крај со блага предност и играчка, но и резултатска на страната на противникот. Ние невообичаено имавме проблем со изнесување на топката во зачетокот на акциите па со огромна борба и покрај многуте повреди и недоволната подготвеност на нашите играчи успевавме да задржиме каква-таква неизвесност. Сепак, недоволно да избегнеме пораз на крајот. За нас настапија играчите кои ги најавивме вчера.

Нашиот тим вечерва во 21:00 часот ќе одигра уште еден натпревар во вообичаениот термин во балонот кај ОУ Рајко Жинзифов. Трет натпревар сезонава и трет различен противник. Овојпат тимот предводен од Амир и уште неколку повремени членови на Лукс кафе засилен со неколку доктори би требало да претставува вистински систематски преглед за Бутоп пред почетокот на новата сезона на Маалската лига, која неофицијално треба да започне наредната недела. На задоволство на фановите, денеска во нашиот состав имаме тројца повратници кои ќе ги одиграат своите први минути сезонава: Смиљковски, Вангеловски и Колев, а ќе настапат и Костовски, Чаковски, Велковски и Видиниќ.

КМФ Балкан денес преку својата фејсбук страница се пофали дека постигнале договор со нашиот Костадин Колев, кој во овој култен чаирски клуб преминува од редовите на КМФ Бутел. Коки веќе подолг период не настапува редовно за Бутоп поради футсал обврските, но бутопци не го забораваат и со гордост го пратат секој негов чекор. Му посакуваме многу успех и во овој нов предизвик!

Денес Бутоп го слави својот седумнаесетти роденден. Ќе рециклираме дел од објавата од пред две години за јубилејот петнаесет години од формирањето: „15 септември 2007 година беше денот кога започна оваа успешна приказна на клубот кој се обидува да биде на браникот на суштинските вредности на фудбалот и да промовира чесност, витештво и љубов кон убавата игра. Бутоп ги спои наративите на момците од Бутел 1 и Топанско поле кои беа дел од првиот натпревар во тоа септемвриско попладне“ а и до ден денес продолжуваме „со своите заложби да ги зближуваме маалските екипи и да ставаме акцент на уличните фудбалски мајстори,“ па оттаму идејата за Маалската лига која есенва треба да ја доживее својата петта сезона, а чиј основач е токму ФК Бутоп. Останува да си посакаме многу успех и напредок на нашиот клуб, но и индивидуално на сите кои се или биле дел од Бутоп.

Бутоп ја оствари првата победа сезонава откако вчеравечер со златен гол дојде до триумф од 9-8 против тимот на Алиенс. Натпреварот во целиот негов тек беше изедначен и играчки и резултатски. Во последниот напад противникот дојде до израмнување 8-8, по што беше договорено победникот да се одлучи со златен гол, кој се случи веќе во следниот напад во режија на Чаковски и Волчевски. Покрај ова дуо, за Бутоп настапија и Костовски, Каравидов, Велковски, Димитровски и Видиниќ, а имавме и дебитант на голот – младиот Алтај, кој покажа дека поседува потенцијал да биде големо засилување за нашиот тим.