June, 2021

Пред ФК Бутоп остануваат уште само пет дена до крајот на сезоната 2020/2021. Втора по ред која е засегната од пандемијата на Ковид-19, па слично како и лани, во моментов сме на еден натпревар до исполнување на „Кота 14“, односно имаме 13 одиграни натпревари. Во контакт сме со неколку екипи да организираме еден завршен термин до крајот на месецов, па потоа следи редовниот извештај и плановите за наредната сезона.

Ден недела (13.06.2021), претходниот викенд, се одржа мини турнирот во мал фудбал во Златокоп, којшто го најавивме и чии партнери бевме иако не отпатувавме во Србија. Учествуваа четири екипи, а во финалето домаќините беа торпедирани од тимот на соседно Требешиње со конечни 8-1. Овој дуел освен резултатската извесност беше одбележан и со мал инцидент помеѓу нервозните играчи на двата тима, но за среќа се се заврши во најдобар ред.

Денес (21.06) својот роденден го слави Кристијан Велковски. Нашата деветка веќе десет години е дел од Бутоп, од неодамна влезе во клубот играчи со најмалку 100 настапи (моментно има 107), четири пати беше во тимот на сезоната, а два пати освојувач на златната копачка (сезони 2014/2015, 2017/2018). Му посакуваме уште многу победи и голови во синиот дрес, како и успеси на приватен план. Среќен роденден Кико!

Вчерашното спарно попладне (16.06.2021) донесе пораз за Бутоп (3-5) во натпреварот со Дарко ФФМ. Иако поведовме, судиите брзо го свртеа резултатот (1-4) до половина од терминот. Сепак, она што следеше е тешко да се опише и објасни затоа што нашите момци во последните петнаесетина минути десетина пати ја погодија рамката од противничкиот гол, но не успеаја да дојдат и до пресврт. Мечот ќе остане забележан по враќањето на Костовски во тимот првпат по февруари 2020 (ги одигра последните 20 минути), а своето деби го имаше и Марко Јаневски. Настапија осумте играчи кои ги најавивме вчера.

Попладнево (16.06.2021, 18:00 часот) Бутоп ќе одигра натпревар во балонот кај ОУ Пенко против тимот на Дарко Видиниќ. Во списокот за оваа средба се најдоа: Марио Антиќ (голман), Смиљковски, Велковски, Каравидов, Курт, Костовски (за првпат сезонава), Шилегов и Марко Јаневски.

Анел Курт денес го слави својот 29 роденден. Легендарната осмица на Бутоп досега запиша 253 настапи, 9 пати беше во тимот на сезоната, ја освои златната копачка за сезоната 2018/2019. Му посакуваме уште многу успеси во синиот дрес.

Среќен роденден Анел!

Турнирот во Златокоп кој требаше да се одржи изминатиов петок е презакажан за 12 јуни (сабота). Тоа значи нова можност за Бутоп да одговори на поканата за учество и да го има својот прв меѓународен настап. Во моментов се трудиме да се организираме иако имаме доста препреки од техничка природа. Истовремено разгледуваме понуди за термини за наредниве денови со надеж дека ќе имаме успешен финиш на сезоната.

Втора година по ред ФК Бутоп е пријател на турнирот во мал фудбал во Златокоп во околината на Врање. Ова е еднодневен турнир кој го организираат младинците во ова село кон крајот на мај или почетокот на јуни како предвесник на летната турнирска сезона. Турнирот е закажан за утре (петок, 04.06.2021) со почеток во 16:00 часот, а досега се најавени околу десетина екипи. Најверојатно ќе се игра во нокаут формат. Овојпат добивме и официјална покана за учество, но за жал не успеавме да се организираме за ова гостување.