July, 2024

Во екот на летните одмори и паузата помеѓу двете натпреварувачки сезони не сите наши играчи се без фудбалски ангажман. Па така веќе вообичаено Дарко Костовски беше дел од организациониот одбор на турнирот во мал фудбал во село Златокоп, Р. Србија. Турнирот оваа година траеше од 13 до 24 јули, а учествуваа 13 екипи. Освен беспрекорната организација овојпат успехот го зголемува фактот дека домашниот тим Златокоп (за кој Костовски запиша пет настапи) иако беше аутсајдер дури и за поминување на групата стигна до финалето. Таму по голема борба беше сопрен од фаворизираниот тим на соседното село Тибужде (5-3). Со освоениот сребрен медал Костовски успешно ја започнува новата сезона во која очекуваме многу победи и во дресот на Бутоп.

Втора година по ред Дарко Костовски ја понесува титулата голман на сезоната на Бутоп. Ако лани беше изненадување, овојпат тоа не е случај затоа што бутопци полека се навикнаа на играта со голман-играч, а капитенот добро се снајде во новата улога. Во пролетниот дел од сезоната и други наши играчи застанаа на гол, па ќе видиме дали и кој од нашите фудбалери ќе се наметне на оваа позиција во претстојната сезона.

Се потсетуваме на досегашните освојувачи:

2007/2008: Кирил Ѓоргиев – Грмуш

2008/2009: Петар Лазароски

2009/2010: Филип Пејков – Пинки

2010/2011: Филип Пејков – Пинки

2011/2012: Арбен Ејуп

2012/2013: Костадин Колев

2013/2014: Костадин Колев

2014/2015: Костадин Колев

2015/2016: Костадин Колев

2016/2017: Костадин Колев

2017/2018: Костадин Колев

2018/2019: Кирил Ѓоргиев – Грмуш

2019/2020: Кирил Ѓоргиев – Грмуш

2020/2021: Никола Анастасовски – Баркли

2021/2022: Кирил Ѓоргиев – Грмуш

2022/2023: Дарко Костовски

2023/2024: Дарко Костовски

Признанието златна копачка на Бутоп за сезоната 2023/2024 го поделија Марио Вангеловски и Столе Чаковски. Двајцата постигнаа по дваесет гола во своите настапи во Маалската лига. По Сезона 3 (есенскиот дел), Столе имаше предност со 11 погодоци пред Анел со 9 и Кико со 7, но во пролетниот дел Марио ги постигна сите свои дваесет погодоци и дојде до врвот на листата, а Столе со дополнителни девет успеа да се избори да ја подели оваа престижна награда со популарниот Штака.  За Вангеловски ова е трето вакво признание со што се израмнува на врвот во оваа категорија со Дарко Костовски и Кристијан Каравидов. Чаковски пак со ова ја заокружува маестралната сезона на позајмица од својот матичен Сент Патрик во Бутоп во која се најде во тимот на сезоната и имаше најмногу настапи од сите играчи. Трет на крајот во годинешната трка се најде Велковски со четиринаесет гола. Ова е само вторпат златната копачка да ја поделат двајца играчи откако во сезоната 2012/2013 најпрецизни беа Каравидов и Цветковски.

Се потсетуваме на досегашните освојувачи:

2007/2008: Енис Пепиќ – *

2008/2009: Дарко Костовски – 11

2009/2010: Јеткин Сезаир – 9

2010/2011: Јеткин Сезаир – 16

2011/2012: Дарко Костовски – 18

2012/2013: Кристијан Каравидов и Филип Цветковски – 5

2013/2014: Дарко Костовски – 3

2014/2015: Кристијан Велковски – 5

2015/2016: Кирил Смиљковски – *

2016/2017: Марио Вангеловски – 5

2017/2018: Кристијан Велковски – 5

2018/2019: Анел Курт – *

2019/2020: Енис Реџеп – *

2020/2021: Кристијан Каравидов – *

2021/2022: Кристијан Каравидов – *

2022/2023: Марио Вангеловски – 30

2023/2024: Марио Вангеловски и Столе Чаковски – 20

Пред два дена (15.7.2024) Самин Колашинац го прослави својот триесет и први роденден. Нашите фанови го нарекуваа Таличниот Самко во годините кога беше активен во дресот на Бутоп затоа што многу често ни носеше среќа во клучните моменти од натпреварите. Со 87 настапи е десетти на вечната листа. Му посакуваме успех на секое поле.

Среќен роденден Самко!

Сезоната 2023/2024 беше седумнаесетта во постоењето на ФК Бутоп. Во овој годишен извештај ќе се обидеме да се осврнеме на најважните моменти кои ја одбележаа истата.

Веднаш ќе почнеме со потсетување на тоа дека по пауза од цели петнаесет години успеавме клупската витрина да ја збогатиме со тимски пехари и тоа најпрво со пехарот за ферплеј екипа на Сезона 3 од Маалската лига освоен есеноска, а потоа и повредниот пехар за освоеното трето место во четвртата сезона на истото натпреварување, освоен оваа пролет. Ако гледаме чисто статистички, јасен е напредокот во однос на минатата сезона кога срушивме неколку негативни рекорди, како оној за најмал процент освоени бодови (тогаш 37%, а сега 43,9%). Уште еден во низата примери е просекот на постигнати голови кој порасна на 5,9 во споредба со ланските 4,8 кои беа втор најлош учинок во историјата по оној во сезоната 2010/2011 (4,0). Основните бројки изгледаат вака:

Сезонава одигравме 22 натпревари со скор од 9 победи, 2 нерешени и 11 порази. Гол разликата е 130 постигнати и 132 примени голови. Просекот на постигнати голови е 5,9, на примени – 6 по натпревар, или вкупно на нашите натпревари се постигнати 262 погодоци (11,9 во просек).

Една од причините зошто е важна споредбата на штотуку завршената сезона со онаа пред нејзе е фактот дека двете доста наликуваа една на друга поради учеството во Маалската лига, нашиот проект кој успеавме да го одржиме и постепено надградиме четири полусезони по ред. Па така 20 од нашите 22 натпревари се одиграни како дел од Маалската лига и радува тоа што бројките покажуваат очигледен напредок, особено во пролетниот дел кога и го освоивме третото место во МЛ Сезона 4. Уште еден генерален впечаток е дека поголемиот дел од средбите беа неизвесни и оттука немаше многу случаи на убедливи победи или порази. Најубедливите порази ни се од Таверна Шкупи Лукс кафе (6-11, на 21.9.2023) и од Шеча (5-10, на 8.11.2023), а најубедливата победа ја остваривме против Алиенс (11-5, на 18.4.2024). Нашиот одличен финиш на сезоната одговара на изреката дека по дождот доаѓа сонце ако се знае дека во еден момент се најдовме во серија од пет последователни порази и на само еден неуспех до израмнување на негативниот рекорд за порази во низа, но победата против Ак. Ќерим (6-4, на 14.3.2024) како да го сврте моментумот во полза на бутопци кои до крајот на пролетниот дел одиграа многу подобро.

Балонот кај ОУ „Рајко Жинзифов“ во Топанско поле полека се наметнува како наш домашен терен последниве неколку години, па во измината сезона таму одигравме 21 средба со скор 9-2-10. Само еднаш игравме на друго место, во балонот кај ОУ „Пенко“ во Север каде остваривме пораз. Сезонава имавме само 8 противници: ТШ Лукс кафе, Ак. Ќерим (поранешен Барбер шоп Енис), Шеча, Алиенс, Дрим тим, Албајрак Тенда, АММ-Тим и Бутел Илхан. Најмногу средби (5) одигравме со момците од Ак. Ќерим (3 победи и 2 порази), а четири пати се соочивме со АММ-Тим со половичен успех од по две победи за секоја екипа.

Една од целите кои си ги поставивме пред почетокот на сезоната минатото лето беше да ја достигнеме котата од 30 одиграни натпревари, која за жал не успеавме да ја исполниме. Сепак, одржувањето на уште две сезони на Маалската лига го надополнува сето тоа како еден приоритет кој успешно го реализиравме. Нашите момци од друга страна беа активни низ целата сезона, па Курт и Велковски ја предводеа екипата на Корпа во нејзиното прво учество во Бизнис лигата, Димитровски и Смиљковски успешно настапуваа во тимот на Видиниќ во период од неколку месеци, Колев редовно беше дел од тимот на КМФ Бутел во нивните битки во футсал лигата на Македонија, па во еден момент беше поврзуван и со можен трансфер во Шпанија. Анел Курт на 8.11.2023 на натпреварот со Шеча го одигра својот 300 натпревар за Бутоп со што стана четвртиот член на елитниот клуб 300 каде се уште и Костовски, Смиљковски и Каравидов. Зимските подготовки се одржаа по 14. пат и траеја 20 дена, а нашите момци освен натпреварите и тренинзите имаа и повремени организирани дружења, како заедничкото присуство на натпреварот од квалификациите за Европското првенство меѓу Македонија и Италија на Градскиот стадион во Скопје.

Во делот на индивидуалната статистика ќе почнеме со вкупниот број на играчи кои настапија – 26, што е во рамките на востановената практика од претходните три сезони (25 и два пати по 27). Во тимот на сезоната се најдоа три исти играчи како и лани: Костовски (на позицијата голман) со 13 настапи, Курт со 16 настапи и Смиљковски со 12. Вистинско освежување годинава беше тандемот кој ни пристигна од Сент Патрик, Чаковски (кој има најмногу настапи сезонава од сите играчи, 18) и Волчевски (12 настапи) кои заедно со Димитровски (15 настапи) го комплетираат тимот на сезоната. Двоцифрен беше уште и Велковски со 11 настапи, а потоа следат Вучевски со 8, Вангеловски со 7, Каравидов со 6 и Амар Вукељ со 5 настапи. Тројца играчи настапија по два пати: Жерновски, Колев и Желка, а дури 12 играчи запишаа по еден настап: Васил, Ристе Валчанов, Омер, Муки, Кристијан Димовиќ, Бесим Кики, Раим Демир, Фатмир Зука, Никола Џон, Ерман, Ристе Кичовски и Глигоров Алек. Во посебна објава ќе презентираме повеќе детали за трката за златната копачка која овојпат ја поделија Марио Вангеловски и Столе Чаковски.

Работата и функционирањето на веб-страницата и понатаму не позиционира како еден од најтранспарентните професионални или аматерски клубови во земјата. Оваа година имавме 107 објави, што е втора најдобра бројка зад рекордните 128 од претходната 2022/2023 сезона, а пред 103-те објави од сезоната 2020/2021. По месеци почнувајќи од јули 2023 бројот на објави изгледаше вака: 5, 2, 15, 14, 13, 2, 5, 11, 14, 15, 7 и 4. Истовремено продолживме со уредување на фејсбук страната на Маалска лига со навремени известувања и објави за сите резултати, распореди и новости. На почетокот на јуни беше продолжена лиценцата за дополнителни 365 дена. Токму во делот на веб страницата ви најавуваме дополнително освежување и збогатување на содржините за време на овие летни месеци, но и во текот на целата сезона.

Финансиското работење за изминатата сезона би можеле да го наречеме и повеќе од домаќинско затоа што трошоците достигнаа само 11500 денари, многу помалку споредено со претходните три сезони на пример (22000, 23000, 23500). Само еднаш сме потрошиле помалку пари откако ја водиме оваа статистика и тоа во сезоната 2017/2018 со потрошени 7000 денари.

Веќе се работи на плановите за наредната сезона во која се надеваме дека конечно ќе дојдеме и до нов трофеј, но и до повеќе одиграни натпревари. Во фокусот останува развојот на Маалската лига и на онлајн платформите на Бутоп и МЛ, како и заштитата на овие брендови. Меѓу другото, извесно е дека ќе имаме инвестиции во нова опрема и во општествено одговорни активности. Во план е и организирање на неколку тим-билдинг настани и учество на турнири и натпревари во странство.

Спортски поздрав,

Дарко Костовски