March, 2020

Пред четири дена, на 26 март 2020г. Кирил Ѓоргиев Грмуш го прослави својот 27 роденден. Грмуш е наш член уште од воведната 2007/2008, кога и беше голман на сезоната, но потоа некако фудбалот го стави во втор план. Сепак, тој постојано беше со нашиот тим, со спорадични настапи, но и пред се како логистичка и административна поддршка. Од минатата сезона повторно се врати во натпреварувачка форма и му го презема приматот на „единица“ во Бутоп на Колев. Грмуш, ти посакуваме се најдобро, среќен роденден!

Почитувани, со голема радост ве известуваме дека денес го комплетиравме процесот на дигитализација на резултатите на Бутоп во сите досегашни сезони. Истите ќе може да ги погледнете во делот ЕКИПА, рубрика РЕЗУЛТАТИ. Со ова Бутоп станува првиот фудбалски тим во нашата земја кој на јавноста и овозможува онлајн преглед на сите натпревари во својата историја.

2018/2019

2017/2018

2016/2017

2015/2016

2014/2015

2013/2014

2012/2013

2011/2012

2010/2011

2009/2010

2008/2009

2007/2008

*1 – име во тој почетен период: Бутел 1 Балкански Бразилци

*2 – финален меч, освоен трофејот во Железара

^п = пенали

^р = регуларен дел

*3 – име во периодот 20.06 -21.08.2010: Бутел 1

*4 – од тој натпревар со името Бутоп

Паузата од играње натпревари ни остава простор да се позанимаваме со минатото. На денешен ден сме одиграле четири средби, со половичен успех, по две победи и порази и гол разлика 27-27. Во првите три сезони од постоењето имавме натпревари против Големите Уличари на Анел, Јеткин, Пинки. Тие, иако наши првотимци и полноправни членови уште од 2008 година, си функционираа како ГУ на фудбалскиот терен, но уште поважно и надвор од него. Во тие почетни сезони големиот фонд на играчи и слободното време (кое го имавме повеќе, нормално) ни овозможуваа да одиграме против оваа култна група од Топанско, а статистиката од тие натпревари влегува во наследството на Бутоп. Во 2010 година, пораз од ГУ, 5-1. Веќе наредната 2011 година ќе биде одбележана со нашиот настап на Пролетната лига во мал фудбал во Ново Лисиче, а токму на денешен ден се одигра првото коло во кое загубивме 2-8 од Аутсајдери. Уште еден пример за мешање играчи и „братско дерби“ се натпреварите со Примавера. Тие беа актуелни во тој некој втор четиригодишен циклус, па така во 2014 на овој датум доаѓа нашата победа од 10-8 над младинците на Примавера. За нив често играа Даре, Мето, Марио, Коки, практично (повторно) играчи на Бутоп. За крај, 2016 година, победа од 14-6 над нашиот локален ривал Албион Север. Или во табела:

ФК Бутоп како општествено одговорна екипа ја известува јавноста дека ги прекинува своите активности на неопределено време. Ние веќе извесен период бевме на неофицијална пауза, но по последните мерки на Министерството за здравство и темпото со кое се развиваат настаните со коронавирусот се одлучивме на ваков потег. Досега во повеќе наврати сме покажале дека сме отпорни на се и сешто и најчесто нашиот одговор бил „играње фудбал“. Таков беше случајот пред точно четири години (март 2016) кога поради безбедносната ситуација во главниот град околу немирите во Бутел при изградбата на крстот, во сила беше одлука за забрана за фудбал. Тогаш ние покажавме дека фудбалот е поголем од политиката, па на 6 март одигравме натпревар против локалниот ривал Албион Север. Сепак, овојпат најважно е здравјето, па ќе мора да почекаме некое време.

Новата бутелска фудбалска надеж Ристе Валчанов полека, но сигурно го гази патот на многу негови претходници од оваа скопска населба. Од пред неколку месеци е дел од ФК Скопје и работи под палката на Љупчо Марковски – Калц. Бутоп уште лани го препозна неговиот талент, па Рики со своите 15 години веќе втора сезона е клучен играч во нашиот состав. Решивме да поразговараме со него и да ве запознаеме накратко со неговиот фудбалски пат.

Рики, каде се‘ имаш тренирано?

– Па, сменив доста клубови досега. Секаде по малку што се вели. Тренирав во Работнички, потоа во Вардар, бев дел и од Академија Пандев. Добив шанса и на неколку пријателски средби за третолигашот Славија.

Би издвоил ли некој од тренерите со кои си соработувал?

Имав навистина многу тренери. Еве, ако морам само еден, ќе го издвојам Пепи Георгиевски кој ме тренираше во Вардар.

Како дојде до соработката со Скопје?

Одреден период се посветив на индивидуални тренинзи. Повикот од мојот сегашен клуб дојде зимава. Не се мислев премногу и прифатив. Тренерот Калц ја следеше мојата работа па, како на поранешен дефанзивец, му беше особено драго што и јас сум штопер. Почна да ме зема да тренирам со првотимците.

Какви се амбициите за сезонава, тимски и твои лични?

Скопје ќе оди на победа на секој меч. Работиме напорно и професионално. На првите два натпревари пролетва освоивме четири бодови. Јас бев на клупата уште во првото коло против Влазрими. Јас ќе давам се од себе на секој тренинг, како во мојата возрасна категорија, така и со постарите. Дали и колку ќе добивам шанса да играм, ќе видиме.

Ристе, за крај, како е да се игра за Бутоп?

Супер! Тоа за мене е вистинско задоволство. Знам дека имам што да научам од вас, Кире, Анел, Каро ми е речиси како личен ментор. Играњето за Бутоп ќе ми овозможи да ја подобрам техниката, која е клучна во малиот фудбал.

Фала ти и со среќа!

Ништо, нема проблем. И ајде закажете некој термин… – заврши Ристе.

Денес (02.03) својот роденден го прославува Јеткин Сезаир, легендарната десетка на Бутоп. Јеткин нашиот дрес го носеше на 95 натпревари досега, но честите повреди ја успорија неговата кариера. Сепак, ништо не може да ја избрише магијата во неговите маестрални настапи за Бутоп. Му посакуваме се најубаво и скоро враќање на фудбалскиот терен.

Среќен роденден Јеткин!