December, 2018

Откако изминатиов период не успеавме да договориме некој натпревар одлучивме дека е најдобро овие празнични денови да ги искористиме за мало опуштање. Бутопци во неколку наврати неформално се собраа и го прославија пристигнувањето на новата година, се надеваме поуспешна од оваа што изминува. Следи мал дел од забавата.

Како и минатата година, Бутоп и денес одмараше на боксинг-деј. На денешен ден имаме максимални три победи од три одиграни натпревари, а секогаш сме играле во „Антон Димитров“ во Бутел. Ако ништо друго, нашата сала е сега реновирана, па барем е убаво да ги споделиме овие фотографии со јавноста и со сите оние кои се уште не ја посетиле разубавената сала.

И уште една неофицијална најава: во тек се преговори со тимот на Дарко ФФМ за една предновогодишна средба, можно е и за утре. Следете не за повеќе информации.

Во текот на вчерашниот ден (22.12.2018) во Скопје пристигна Андреј Димитровски. Веднаш „се пријави“ во клубот со информација дека ќе биде тука во деновите до новата година. Ни вети дека во овој краток период ќе се обиде да ги реши проблемите со веб-страницата кои се појавија минатиот месец, но и изјави дека би сакал да одигра некоја партија фудбал за Бутоп зашто досега во тековнава сезона не запиша ниту еден настап во синиот дрес. А, ние се надеваме дека успешните игри за ЕПАМ ќе ги пренесе и во Бутоп.

Денес (12 декември) својот роденден го прославува Никола Анастасовски – Баркли. Иако досега само два пати настапи за нашиот тим, тој подолго време е наша поддршка, но и опција да помогне секогаш кога е тешко. Му посакуваме многу успеси во иднина.

Среќен роденден Баркли!

На 10 декември 1991 година во Скопје е роден Сашо Наумовски – Цамба. Досега собра 8 настапи за Бутоп. Можеби малкумина го знаат податокот дека Саше играше на првиот наш натпревар воопшто, на 15.09.2007-та година. Му посакуваме се најдобро.

Среќен роденден Цамба!

На денешен ден немаме одиграно ниту еден натпревар, но не е дека немаме што да одбележиме. За оние кои се сомневаат во вистинитоста на нашите објави, еве еден цврст доказ за нашата професионалност. Пред точно една година објавивме еден ексклузивен разговор со Елиф Елмас. Тој ни потврди дека останува во Фенербахче и покрај многуте шпекулации во домашните медиуми дека во јануарскиот преоден рок ќе го напушти Истанбул, а се поради малата минутажа која ја добиваше. Но, некои работи се сменија. Елиф сезонава се избори за своето место во тимот на Фенер, а тоа што не се смени е одлучноста на ФК Бутоп да биде лидер во транспарентноста и ексклузивните објави меѓу фудбалските клубови во Македонија. Следува линкот од минатогодишната објава:

Елмас: Останувам во Фенер

Денес, 03 декември, својот роденден го прославува Марио Вангеловски. Нашиот робусен напаѓач ја освои златната копачка во сезоната 2016-2017 со постигнати пет турнирски голови, а досега запиша 40 настапи за тимот на Бутоп. Му посакуваме уште многу повеќе успеси во фудбалот и животот.

Среќен роденден Марио!

И оваа полусезона мака мачиме да фатиме натпреварувачки ритам. Така е веќе две-три години. Но, секогаш досега сме ја исполнувале онаа „кота 14“, која го означува минималниот број на натпревари кои сме ги одиграле во една сезона. Што се однесува на полусезоните, најмалку во една полуетапа сме имале пет натпревари. Оваа есен досега игравме четири пати, а за штотуку започнатиов месец очекуваме и се надеваме дека ќе ни донесе барем уште некоја средба. Тоа ни е повеќе од потребно по поразот од Екипа Чаир, но и за воигрување на екипата која покажува многу осцилации во текот на играта.