March, 2023

Бутоп доживеа неверојатен и слободно може да кажеме трагичен пораз на синоќешниот одлучувачки натпревар за влез во плејофот на Маалската лига. На педесет секунди до крајот имавме водство од 6-5 и победа која ни го гарантираше тоа посакувано четврто место, кога Алиенс постигна гол за израмнување. Нашите момци веднаш тргнаа од центарот во потрага по нов гол, но наместо тоа противникот не казни и по пресечена топка погоди во празната мрежа за конечни Бутоп-Алиенс 6:7. На овој натпревар не видовме некоја квалитетна игра, туку многу грешки на двете страни. За жал, ние излеговме како губитници на крајот. За Бутоп настапија играчите кои ги најавивме вчера, Курт беше во улога на голман, а Кирил Смиљковски стана третиот играч кој запишал 300 настапи за нашиот клуб.

Бутоп на вечерашниот натпревар со Алиенс (20:40) кој ќе одлучи дали ќе играме во плејофот на Маалската лига ќе настапи со шест играчи и без класичен голман. Во тимот најавени се Курт, Смиљковски, Каравидов, Вангеловски, Валчанов и Амар Вукељ. Смиљковски ќе го одигра својот јубилеен тристоти натпревар во дресот на Бутоп.

Бутоп и Алиенс, двете екипи кои во воведното издание на Маалската лига се бореа за тоа кој да го избегне фенерот, во оваа втора сезона, задутре (со почеток во 20:40), ќе ја водат конечната битка за последниот патник во плејофот каде најдобрите четири тима ќе одлучуваат за распределбата на пехарите. Бутоп има мала предност бидејќи во моментов е четврти на табелата (Алиенс е шести со два бода помалку), но ако се земе предвид дека Сент Патрик има натпревар со Каќ кој последните три средби ги загуби службено, станува јасно дека нашите момци ќе мора да дојдат до победа ако сакаат да стигнат до посакуваната цел – плејофот.

Денес својот триесетти роденден го слави Кирил Ѓорѓиев – Грмуш. Нашата 12-ка е дел од клубот од самите почетоци и досега собра 44 настапи, а во четири наврати беше прогласен и за голман на сезоната (2007/2008, 2018/2019, 2019/2020 и 2021/2022). Му посакуваме се најубаво. Среќен роденден Грмуш!

Бутоп вчера запиша службена победа од 5-0 откако тимот на Каќ не се појави во закажаниот термин. Со овие три бода бутопци се пробија на четвртата позиција на табелата во Маалската лига пред одигрување на последното коло од регуларниот дел наредниот четврток. Противник тогаш ќе ни биде стариот познаник Алиенс и со победа го заверуваме пласманот во плејофот и борбата за пехарите.

Бутоп вечерва треба да се сретне со екипата на Каќ во рамките на шестото коло на Маалската лига. Оваа средба е прва на вечерашната програма и е закажана за 19:40 часот. Останува да видиме дали по два службени порази овој тим ќе се појави токму за натпреварот против Бутоп.

Дури во петтото коло Бутоп конечно ја оствари првата победа во новата сезона на Маалската лига. Вчера вечерта беше победен до тој момент лидерот на табелата и непогрешлив тим на Лукс кафе со гол на четири секунди до крајот за конечни 6-5. Дека бутопци ја креваат формата можеше да се забележи и во претходните натпревари, а вчера за среќа тоа се покажа и резултатски. Натпреварот беше рамноправен, со силно офанзивно и дефанзивно темпо од двете страни. Ние повторно игравме со голман играч, овојпат Смиљковски се најде во таа улога, а во стартната шесторка настапија и Курт, Димитровски, Русе, Видиниќ и Валчанов. Конечно го видовме и камбекот на најдобриот стрелец од есеноска, Марио Вангеловски, кој почна од клупата, а беше стрелец на победничкиот гол. Со оваа победа Бутоп скокна до петтото место на табелата и сега сам одлучува за пласманот во плејофот.

Утре се игра петтото коло во Маалската лига во кое Бутоп се соочува со голем предизвик, лидерот на табелата Лукс кафе. Дали и реално нашата прва победа во оваа втора сезона да ја оствариме токму на овој натпревар ќе дознаеме нешто по 20:00 часот. Почетокот на средбата е закажан за 19:50. Минатата есен бутопци два пати загубија од овој противник, но во возвратниот дуел пружија отпор до самиот крај што дава надеж за можно изненадување на утрешната средба.

Бутоп не успеа да дојде до првата победа во новата сезона на Маалската лига откако вчера одигра (само) нерешено со тимот на Барбер шоп Енис. Веројатно ниту една од екипите не е среќна со конечниот резултат 5-5. Бутопци затоа што при водство од 4-2 на седум минути до крајот имаа две-три супер шанси за да го решат натпреварот, а противникот затоа што погоди статива во последните секунди. Ние повторно немавме опција на голманската позиција, па Анел втор натпревар по ред ја имаше улогата голман-играч, која претходно ја покриваше повредениот Костовски. Во поле настапија Смиљковски, Видиниќ, Каравидов, Димитровски и Валчанов. По четири одиграни кола Бутоп се наоѓа на седмото место со два освоени бода.

ФК Бутоп на сите жени им го честита меѓународниот ден на жената. Среќен Осми март!