АКТУЕЛНОСТИ

Бутоп и Алиенс вечерва (21:45) слават мал јубилеј во меѓусебните пресметки затоа што го играат десеттиот натпревар. Ние имаме подобар скор остварувајќи пет победи, два пати било нерешено, а две победи се за Алиенс. Дали ќе успееме да ја прекинеме лошата серија од четири порази во низа во Маалската лига многу ќе зависи од тактичките решенија. Интересно, Бутоп денес ќе настапи без класичен голман, а со дури осум играчи, што значи освен ротација на голманската позиција ќе има доста измени и во поле. Како ќе изгледа сето тоа останува да видиме.

И без да направевме поглед низ статистичките податоци од минатото, јасно беше дека ја играме една од најлошите сезони, барем кога станува збор за резултатите. По девет натпревари во новата сезона 2024/2025 имаме скор од по една победа и нерешено и дури седум порази, што е практично израмнување на скорот по првите девет средби во досега најлошата сезона 2022/2023. Тогаш ја создадовме Маалската лига, па тоа ниво и темпо на натпреварување можеби ни дојде премногу, овојпат некакво оправдување би била недоволната подготвеност затоа што буквално во сите шест натпревари во рамките на МЛ имавме водство од минимум два разлика. Шанса да го поправиме впечатокот имаме веќе утре во новиот натпревар со стариот познаник Алиенс.

Денеска беа објавени термините за натпреварите од седмото коло во Маалската лига кое се игра в четврток (07.11.2024). Ние го добивме вториот термин, од 21:45 часот, како и пред две недели за дуелот со Шкупи старс. Овојпат наш противник е Алиенс, единствената екипа против која не загубивме сезонава во МЛ (реми) и единствената екипа против која воопшто победивме во подготвителниот период пред настапите во лигата.

Бутоп не успева да ја прекине низата неверојатни порази откако вчера загуби во маалското класико од Лукс кафе со конечни 5-4. Шемата е веќе добро позната: наше водство, контрола врз играта, а потоа несфатлив пад пред крајот на натпреварот и пресврт на противникот. Овој пораз особено горчи затоа што имавме неколку прилики да ја запечатиме победата при наше водство од 4-2, но сега сето тоа мора да го оставиме зад нас. Првпат за Бутоп во Маалската лига настапи Алтај Мурселов кој имаше одлична партија на голот, а во поле настапија Димитровски, Чаковски, Волчевски, Видиниќ, Костовски и дебитантот Александар Ќоќоровски, кој беше капитен на АММ-Тим во некои претходни изданија на МЛ.

Вечерва во 21:00 часот Бутоп и Лукс кафе го играат десеттиот меѓусебен дуел. Овојпат како дел од шестото коло во МЛС5 во ситуација кога ние сме на дното на табелата, а стариот познаник е лидер во поредокот. Дали бутопци можат да приредат изненадување или ќе продолжи нашата црна серија? Одговорот ќе го дознаеме нешто пред 22:00 часот. За Бутоп денес во составот се најавени: Мурселов, Димитровски, Чаковски, Волчевски, Видиниќ, Ќоќоровски и Костовски.

Бутоп в четврток (31.10.2024) се среќава со старите познаници Лукс кафе во натпревар кој претставува своевидно класико на Маалската лига. Досега веројатно немало полош момент за нас пред ова дерби затоа што ние сме на дното на табелата, а Лукс кафе игра во одлична форма и се лидери по првата половина од сезоната. Сепак, бутопци сигурно нема да излезат со бело знаме и ќе се обидат да направат изненадување како многупати досега. Натпреварот ја отвара програмата на шестото коло и започнува во 21:00 часот.

Нов убедлив пораз (2-7) на нашиот тим е епилогот од вчерашниот натпревар против Шкупи Старс со кој Бутоп го допре дното на поредокот во Маалската лига. Со четвртиот пораз во петте натпревари остануваме единствената екипа без победа во ова друштво. А почнавме добро и поведовме, како и на сите претходни средби сезонава. И повторно второто полувреме кобно за нас, и повторно противникот пресилен во најважните моменти. Не помогна ни фактот што за првпат сезонава бевме со комплетен состав од седум играчи плус голман. Од вчерашните натпревари за издвојување е и дербито кое Лукс кафе го доби против Галактикос, со што ги престигна на табелата и е лидер на половина од Сезона 5.

Бутопци вечерва во 21:45 против Шкупи Старс го играат својот натпревар од петтото коло на МЛС5 и за првпат ќе излезат со комплетен тим. Тоа значи дека на голот повторно имаме класичен голман – Мартин, кој одлично се покажа на минатата средба, но и две измени во поле. Најавени се Курт, Велковски, Смиљковски, Костовски, Волчевски, Чаковски и Видиниќ.

Денеска беа објавени термините за натпреварите од петтото коло во Маалската лига, во кое Бутоп се среќава со тимот на Шкупи Старс. Ова практично ќе биде дерби на дното затоа што двете екипи заедно досега освоија само еден бод и се на последните места на табелата. Средбата се игра во четврток (24.10.2024) и почнува во 21:45.

Уште една новина од проектот „Веб 2024“ е тоа што отсега ќе можете да го пратите распоредот на нашите натпревари во делот ЕКИПА/Распоред. Освен оние средби кои се закажани, достапни се и резултатите од одиграните натпревари во тековната сезона. Во делот Резултати уште од поодамна се достапни сите резултати на Бутоп од формирањето во 2007 година па наваму.

Бутоп вчера доживеа уште еден пораз во Маалската лига. Подобри од нас овојпат беа фудбалерите на Интер Балкан кои со пресврт дојдоа до победата од 11-7. Речиси неверојатно делува фактот дека и четврти пат имавме водство поголемо од два разлика и како и претходно, успеавме да го прокоцкаме за трет пораз во овие четири кола од Сезона 5 на МЛ. Повторно се случи огромен пад во второто полувреме кога бевме немоќни да го спречиме налетот на противниците. За Бутоп дебитираа Мартин Анакијев и Никола Спасовски, играчи кои настапуваат за тимот на Корпа во Бизнис лигата.