Archives

Бутоп вечерва во 21:00 часот го игра натпреварот од четвртото коло на МЛ против тимот на Интер Балкан, екипа која е дебитант во ова натпреварување, а со самото тоа и нов, непознат противник за нашите момци. И покрај тоа што не знаеме што треба да очекуваме во вечерашниот дуел бидејќи Интер Балкан прикажа променлива игра и резултати во првите три кола остварувајќи по една победа, нерешено и пораз, пред бутопци остануваат старите императиви: консолидација на играта и потрага по три бода, кои би биле први во новата сезона на Маалска лига. Од стандардните играчи вечер ќе настапат Курт, Велковски, Чаковски, Волчевски и Видиниќ, а имаме и голман и уште еден играч како позајмени.

Убава вест за сите во ФК Бутоп: нашиот клуб постигна договор со Алтај Мурселов. Младиот и перспективен голман го имаше своето деби за нашиот тим минатиот месец на 12 септември во триумфот против Алиенс. Станува збор за бутелски талент кој веќе две години гради футсал кариера во КМФ Балкан, тимот за којшто неодамна договор потпиша и нашата легенда Костадин Колев. Со Алтај се договоривме да му се става на располагање на Бутоп тогаш кога тоа ќе му го дозволат обврските спрема КМФ Балкан бидејќи професионалната кариера е неговиот приоритет. За жал, четвртоците во моментов му се предвидени за тренинзи, па не е во можност да ја покрие дефицитарната голманска позиција во нашите битки во Маалската лига. Во секој случај, овој договор е влог за иднината и се надеваме дека Алтај ќе има прилики за повеќе настапи за Бутоп во периодот кој следи.

Бутоп не успеа да го изненади одличниот Галактикос Тим и загуби со убедливи 9-2 во вчерашниот натпревар од третото коло во Маалската лига. Цело прво полувреме успеавме да бидеме рамноправни со лидерот на табелата, па дури и водевме 2-1 до деветнаесеттата минута кога со два брзи гола галактичните дојдоа до пресврт и со минимална предност отидоа на кратката пауза. Во вториот дел се повтори нашата болка од претходните два натпревара, играта потполно ни се распадна и повторно како и против Алиенс не успеавме да постигнеме ниту еден гол во второто полувреме. Со овој пораз паднавме на петтата позиција на табелата, додека Галактикос е сигурен на врвот.

Бутоп вечерва со почеток во 21:00 часот ќе го предизвика лидерот на Маалската лига, Галактикос Тим. Галактичните во првите две кола остварија убедливи победи од 15-3 (Интер Балкан) и 11-3 (Шкупи старс) па влегуваат како фаворити во денешниот натпревар. Дали нашите момци ќе успеат да направат изненадување ќе дознаеме вечерва околу 22:00 часот. За Бутоп ќе настапат Смиљковски, Чаковски, Волчевски, Вучевски, Видиниќ, Димитровски и Курт.

Легендарниот шпански репрезентативец и поранешен играч на Барселона Андрес Иниеста денеска објави крај на својата професионална кариера. Големиот мајстор на фудбалската игра беше инспирација за нашата генерација и пример како се сака фудбалот. ФК Бутоп им се приклучува на бројните светски клубови во честитките кон Иниеста и желбите за успешна фудбалска пензија и му се заблагодарува за се она што го направи за нашиот спорт. Овде ќе потсетиме и на еден момент од 2017 година кој ги поврзува Бутоп и големиот Иниеста. Имено, на 11 јуни таа година на Националната арена во Скопје нашиот Елиф Елмас го имаше дебито за А селекцијата на Македонија во натпревар со Шпанија. Со самото влегување на терен во второто полувреме, уште во првите секунди Елиф влезе во дуел со шестката на Шпанците при што му ја одзеде топката и на тој начин ја најави и својата успешна репрезентативна кариера. Тој натпревар на крајот заврши со победа на Шпанија од 2-1, но бутопци секогаш ќе се сеќаваат како еден нивен играч, кој пред само година дена го бранеше нашиот дрес во пресметки со тимови како Радишани дечки, Радишани Скопје и Албион Север излезе на мегдан со еден од најдобрите светски фудбалери на сите времиња.

Бутопци ги дознаа термините за наредните две кола во Маалската лига, па во третото, како и во четвртото коло средбите ќе ги играме во првиот термин од 21:00 часот. Најпрво овој четврток му одиме на мегдан на лидерот на табелата Галактикос Тим, а потоа на 17 октомври играме со Интер Балкан. Во првите две кола Бутоп освои еден бод иако според прикажаната игра можеше многу повеќе.

Пред точно шеснаесет години на денешен ден (4.10.2008) Бутоп го освои турнирот во скопска Железара и го оствари првиот позабележителен успех во својата историја. Тоа попладне финалето започна во 15:00 часот, а наш противник во финалето кое го добивме со 6-3 беше екипата на Турци ЈБТ. Нашиот тим на овој турнир го сочинуваа Петар Лазароски, Андреј Димитровски, Дарко Костовски, Харис Фекиќ, Анел Курт, Јеткин Сезаир и Кристијан Каравидов. Фотографијата во прилог е од пред почетокот на финалето.

Бутоп и Алиенс одиграа драматичен натпревар во рамките на второто коло на Маалската лига кој заврши со поделба на бодовите, 4-4. А можеа бутопци и многу повеќе, особено што го диктираа темпото речиси во текот на целиот натпревар. На полувремето имавме водство од 4-2 и во првите десет минути од вториот дел не искористивме неколку чисти шанси за зголемување на предноста. Казната по обичај стигна и противниците дојдоа до израмнувањето во последните минути.

Составот на Бутоп за вечерашната средба со Алиенс (21:45) изгледа доста офанзивно, барем на хартија. Нападот ќе го предводат играчите кои лани ја поделија наградата златна копачка на сезоната, Вангеловски и Чаковски, а покрај нив во тимот ќе бидат и Смиљковски, Димитровски, Велковски и Вучевски. Костовски и Курт поради повреди натпреварот ќе го проследат од трибините.