Archives

Како дел од проектот „Веб 2024“ една од првите акции беше поставувањето на сите досегашни годишни извештаи на едно место, во поткатегоријата ИЗВЕШТАИ од категоријата ЕКИПА. Станува збор за десет вакви документи бидејќи првиот извештај беше објавен на 1 јули 2015 за штотуку завршената сезона 2014/2015, што логично се поклопува со раѓањето на оваа веб-страница истата година.

Освен ова, го дополнивме и делот РЕЗУЛТАТИ со резултатите за сезоната 2023/2024, нешто што редовно го правиме веќе неколку години. Па така, фановите во секој момент можат да ги најдат резултатите од сите натпревари во историјата на ФК Бутоп.

Истотака во моментов можете да ја видите и објавата од пред четири дена: Статистика сезона по сезона, каде што во табела се претставени скорот од натпреварите (победи, нерешени, порази), како и постигнатите и примени голови и  просеците, освоените бодови и процентот на освоени бодови по сезона. Оваа објава дополнително ќе го најде своето место во категоријата СТАТИСТИКА кога истата ќе го добие новиот лик.

Во тек е голема реконструкција на веб страницата на ФК Бутоп со која се планираат бројни дополнувања за нашите верни поддржувачи и сите оние кои сакаат да дознаат повеќе за историјата на нашиот клуб. Иако освежувањето на нашиот сајт е нешто на кое работиме постојано, обемноста на потфатот оваа година не натера да го наречеме овој процес проект „Веб 2024“, а за новите содржини ќе ве известуваме одвреме навреме и во делот Актуелности. Проектот започна во јуни, а планираме да се комплетира некаде во ноември. Посетителите на butop.info веќе можат да ги забележат дел од промените на категориите и поткатегориите на веб-страницата, но допрва сите тие треба да се уредат и збогатат со текстови, фотографии, табели и слично.

Огромно е задоволството да и го претставиме на јавноста освежениот и модернизиран амблем на ФК Бутоп. Проектот беше комплетиран во текот на месец јули, а станува збор за техничко дотерување на веќе постоечкиот, актуелен амблем од 2015 година, кој веќе еднаш беше дополнет во 2020 г. при принтањето на новите сини дресови. Единствената измена е во бојата на цифрите кои ја означуваат годината на формирањето на клубот (2007), од сина во бела. За разлика од пред четири години, овојпат потфатот е многу позначаен затоа што ФК Бутоп доби целосно векторизирано лого, како и црно-бела и транспарентна верзија од истото, а плус и верзија со елипсовидна позадина. Сето ова гарантира највисок квалитет при принтање и поставување на амблемот на секаква подлога. Ова е уште еден новитет со кој Бутоп го достигнува нивото на професионалните спортски колективи.

Андреј Димитровски вчера (6.8.2024) го прослави својот 32. роденден. Андреј е легенда на Бутоп и е со клубот од самите почетоци. Досега запиша 287 настапи, а пролетоска ја имаше честа да го подигне пехарот за освоеното трето место во МЛ. Му посакуваме се најдобро. Среќен роденден Андреј!

Во екот на летните одмори и паузата помеѓу двете натпреварувачки сезони не сите наши играчи се без фудбалски ангажман. Па така веќе вообичаено Дарко Костовски беше дел од организациониот одбор на турнирот во мал фудбал во село Златокоп, Р. Србија. Турнирот оваа година траеше од 13 до 24 јули, а учествуваа 13 екипи. Освен беспрекорната организација овојпат успехот го зголемува фактот дека домашниот тим Златокоп (за кој Костовски запиша пет настапи) иако беше аутсајдер дури и за поминување на групата стигна до финалето. Таму по голема борба беше сопрен од фаворизираниот тим на соседното село Тибужде (5-3). Со освоениот сребрен медал Костовски успешно ја започнува новата сезона во која очекуваме многу победи и во дресот на Бутоп.

Втора година по ред Дарко Костовски ја понесува титулата голман на сезоната на Бутоп. Ако лани беше изненадување, овојпат тоа не е случај затоа што бутопци полека се навикнаа на играта со голман-играч, а капитенот добро се снајде во новата улога. Во пролетниот дел од сезоната и други наши играчи застанаа на гол, па ќе видиме дали и кој од нашите фудбалери ќе се наметне на оваа позиција во претстојната сезона.

Се потсетуваме на досегашните освојувачи:

2007/2008: Кирил Ѓоргиев – Грмуш

2008/2009: Петар Лазароски

2009/2010: Филип Пејков – Пинки

2010/2011: Филип Пејков – Пинки

2011/2012: Арбен Ејуп

2012/2013: Костадин Колев

2013/2014: Костадин Колев

2014/2015: Костадин Колев

2015/2016: Костадин Колев

2016/2017: Костадин Колев

2017/2018: Костадин Колев

2018/2019: Кирил Ѓоргиев – Грмуш

2019/2020: Кирил Ѓоргиев – Грмуш

2020/2021: Никола Анастасовски – Баркли

2021/2022: Кирил Ѓоргиев – Грмуш

2022/2023: Дарко Костовски

2023/2024: Дарко Костовски

Признанието златна копачка на Бутоп за сезоната 2023/2024 го поделија Марио Вангеловски и Столе Чаковски. Двајцата постигнаа по дваесет гола во своите настапи во Маалската лига. По Сезона 3 (есенскиот дел), Столе имаше предност со 11 погодоци пред Анел со 9 и Кико со 7, но во пролетниот дел Марио ги постигна сите свои дваесет погодоци и дојде до врвот на листата, а Столе со дополнителни девет успеа да се избори да ја подели оваа престижна награда со популарниот Штака.  За Вангеловски ова е трето вакво признание со што се израмнува на врвот во оваа категорија со Дарко Костовски и Кристијан Каравидов. Чаковски пак со ова ја заокружува маестралната сезона на позајмица од својот матичен Сент Патрик во Бутоп во која се најде во тимот на сезоната и имаше најмногу настапи од сите играчи. Трет на крајот во годинешната трка се најде Велковски со четиринаесет гола. Ова е само вторпат златната копачка да ја поделат двајца играчи откако во сезоната 2012/2013 најпрецизни беа Каравидов и Цветковски.

Се потсетуваме на досегашните освојувачи:

2007/2008: Енис Пепиќ – *

2008/2009: Дарко Костовски – 11

2009/2010: Јеткин Сезаир – 9

2010/2011: Јеткин Сезаир – 16

2011/2012: Дарко Костовски – 18

2012/2013: Кристијан Каравидов и Филип Цветковски – 5

2013/2014: Дарко Костовски – 3

2014/2015: Кристијан Велковски – 5

2015/2016: Кирил Смиљковски – *

2016/2017: Марио Вангеловски – 5

2017/2018: Кристијан Велковски – 5

2018/2019: Анел Курт – *

2019/2020: Енис Реџеп – *

2020/2021: Кристијан Каравидов – *

2021/2022: Кристијан Каравидов – *

2022/2023: Марио Вангеловски – 30

2023/2024: Марио Вангеловски и Столе Чаковски – 20

Пред два дена (15.7.2024) Самин Колашинац го прослави својот триесет и први роденден. Нашите фанови го нарекуваа Таличниот Самко во годините кога беше активен во дресот на Бутоп затоа што многу често ни носеше среќа во клучните моменти од натпреварите. Со 87 настапи е десетти на вечната листа. Му посакуваме успех на секое поле.

Среќен роденден Самко!