Archives

Денес Бутоп го слави својот седумнаесетти роденден. Ќе рециклираме дел од објавата од пред две години за јубилејот петнаесет години од формирањето: „15 септември 2007 година беше денот кога започна оваа успешна приказна на клубот кој се обидува да биде на браникот на суштинските вредности на фудбалот и да промовира чесност, витештво и љубов кон убавата игра. Бутоп ги спои наративите на момците од Бутел 1 и Топанско поле кои беа дел од првиот натпревар во тоа септемвриско попладне“ а и до ден денес продолжуваме „со своите заложби да ги зближуваме маалските екипи и да ставаме акцент на уличните фудбалски мајстори,“ па оттаму идејата за Маалската лига која есенва треба да ја доживее својата петта сезона, а чиј основач е токму ФК Бутоп. Останува да си посакаме многу успех и напредок на нашиот клуб, но и индивидуално на сите кои се или биле дел од Бутоп.

Бутоп ја оствари првата победа сезонава откако вчеравечер со златен гол дојде до триумф од 9-8 против тимот на Алиенс. Натпреварот во целиот негов тек беше изедначен и играчки и резултатски. Во последниот напад противникот дојде до израмнување 8-8, по што беше договорено победникот да се одлучи со златен гол, кој се случи веќе во следниот напад во режија на Чаковски и Волчевски. Покрај ова дуо, за Бутоп настапија и Костовски, Каравидов, Велковски, Димитровски и Видиниќ, а имавме и дебитант на голот – младиот Алтај, кој покажа дека поседува потенцијал да биде големо засилување за нашиот тим.

Бутопци вечерва (21:00 часот) ќе ги одмерат силите со старите познаници од Маалската лига –  Алиенс. По минатонеделниот пораз на отворањето на сезоната ова ќе биде нова шанса за подигнување на натпреварувачкиот ритам, а се надеваме и победа. Натпреварот се игра во балонот кај ОУ Рајко Жинзифов.

Како дел од проектот „Веб 2024“ денес ги објавивме сите досегашни седумнаесет тимови на сезоната на Бутоп графички претставени преку апликацијата buildlineup. Најдобриот тим на сезоната во нашиот клуб се избира според бројот на настапи на играчите, односно оние кои имале најмногу настапи влегуваат во идеалната шесторка. Сето ова може да го пронајдете на оваа веб-страница кај поткатегоријата „Тим на сезоната“ во категоријата „Статистика“.

Овде ви го прикажуваме идеалниот тим од минатата сезона:

Приказ на сите идеални тимови по сезони:

ФК Бутоп на сите граѓани им го честита Денот на независноста на Република Македонија. За многу години!

Денес Кирил Смиљковски го прославува својот 32 роденден. Основач, капитен и жива легенда на Бутоп без кого овој тим не би бил тоа што е. Од неговите бројни рекорди ќе издвоиме дека со 314 настапи е втор на вечната листа, 12 пати беше дел од тимот на сезоната и освојувач на златната копачка во сезоната 2015/2016. Му посакуваме се најубаво на приватен и на професионален план. Среќен роденден Кире!

Бутоп со пораз ја отвори новата сезона откако вчеравечер тимот на Бутел Илхан Р беше поуспешен со конечни 13-10, за седма по ред победа во меѓусебните дуели. Противникот почна силно и набрзина поведе со 3-0, но следеше одговор од бутопци кои со пресврт дојдоа до водство од 4-3. Сепак, тимот предводен од расположениот Илхан Алити направи серија од 5-0 со што го реши прашањето за победникот па до крајот единствено ни остана да се бориме за прифатлив пораз. За Бутоп настапија Курт, Костовски, Велковски, Волчевски, Чаковски, Зука и Видиниќ, додека за нашиот ривал играше и Енис Реџеп кој беше наш најдобар стрелец во сезоната 2019/2020.

Бутоп вечерва (21:00 часот) ја започнува својата 18. сезона со најнезгодниот противник, тимот на Бутел Илхан Р. Со момците на Илхан се сретнавме и во првиот натпревар во календарската 2024 година, кога по голема драма загубивме 8-7 остварувајќи го шестиот последователен пораз од овој тим во последните четири сезони. Вкупниот скор на единаесетте меѓусебни средби е четири победи за Бутоп, а седум победи за Бутел Илхан Р. Вечерашниот натпревар се игра во балонот кај ОУ Рајко Жинзифов во Топанско поле.

Супер вест за сите бутопци: утре (5.9.2024) Бутоп го игра својот прв натпревар во новата сезона, за нас 18-та во историјата. Терминот се игра од 21:00 часот во балонот кај ОУ Рајко Жинзифов, а противникот ќе го дознаеме во текот на денешниот ден. Во моментов течат преговори со три екипи потенцијални ривали. Повеќе информации за противничката екипа, но и за составот на Бутоп ќе објавиме утре.