Archives

Сезоната 2023/2024 беше седумнаесетта во постоењето на ФК Бутоп. Во овој годишен извештај ќе се обидеме да се осврнеме на најважните моменти кои ја одбележаа истата.

Веднаш ќе почнеме со потсетување на тоа дека по пауза од цели петнаесет години успеавме клупската витрина да ја збогатиме со тимски пехари и тоа најпрво со пехарот за ферплеј екипа на Сезона 3 од Маалската лига освоен есеноска, а потоа и повредниот пехар за освоеното трето место во четвртата сезона на истото натпреварување, освоен оваа пролет. Ако гледаме чисто статистички, јасен е напредокот во однос на минатата сезона кога срушивме неколку негативни рекорди, како оној за најмал процент освоени бодови (тогаш 37%, а сега 43,9%). Уште еден во низата примери е просекот на постигнати голови кој порасна на 5,9 во споредба со ланските 4,8 кои беа втор најлош учинок во историјата по оној во сезоната 2010/2011 (4,0). Основните бројки изгледаат вака:

Сезонава одигравме 22 натпревари со скор од 9 победи, 2 нерешени и 11 порази. Гол разликата е 130 постигнати и 132 примени голови. Просекот на постигнати голови е 5,9, на примени – 6 по натпревар, или вкупно на нашите натпревари се постигнати 262 погодоци (11,9 во просек).

Една од причините зошто е важна споредбата на штотуку завршената сезона со онаа пред нејзе е фактот дека двете доста наликуваа една на друга поради учеството во Маалската лига, нашиот проект кој успеавме да го одржиме и постепено надградиме четири полусезони по ред. Па така 20 од нашите 22 натпревари се одиграни како дел од Маалската лига и радува тоа што бројките покажуваат очигледен напредок, особено во пролетниот дел кога и го освоивме третото место во МЛ Сезона 4. Уште еден генерален впечаток е дека поголемиот дел од средбите беа неизвесни и оттука немаше многу случаи на убедливи победи или порази. Најубедливите порази ни се од Таверна Шкупи Лукс кафе (6-11, на 21.9.2023) и од Шеча (5-10, на 8.11.2023), а најубедливата победа ја остваривме против Алиенс (11-5, на 18.4.2024). Нашиот одличен финиш на сезоната одговара на изреката дека по дождот доаѓа сонце ако се знае дека во еден момент се најдовме во серија од пет последователни порази и на само еден неуспех до израмнување на негативниот рекорд за порази во низа, но победата против Ак. Ќерим (6-4, на 14.3.2024) како да го сврте моментумот во полза на бутопци кои до крајот на пролетниот дел одиграа многу подобро.

Балонот кај ОУ „Рајко Жинзифов“ во Топанско поле полека се наметнува како наш домашен терен последниве неколку години, па во измината сезона таму одигравме 21 средба со скор 9-2-10. Само еднаш игравме на друго место, во балонот кај ОУ „Пенко“ во Север каде остваривме пораз. Сезонава имавме само 8 противници: ТШ Лукс кафе, Ак. Ќерим (поранешен Барбер шоп Енис), Шеча, Алиенс, Дрим тим, Албајрак Тенда, АММ-Тим и Бутел Илхан. Најмногу средби (5) одигравме со момците од Ак. Ќерим (3 победи и 2 порази), а четири пати се соочивме со АММ-Тим со половичен успех од по две победи за секоја екипа.

Една од целите кои си ги поставивме пред почетокот на сезоната минатото лето беше да ја достигнеме котата од 30 одиграни натпревари, која за жал не успеавме да ја исполниме. Сепак, одржувањето на уште две сезони на Маалската лига го надополнува сето тоа како еден приоритет кој успешно го реализиравме. Нашите момци од друга страна беа активни низ целата сезона, па Курт и Велковски ја предводеа екипата на Корпа во нејзиното прво учество во Бизнис лигата, Димитровски и Смиљковски успешно настапуваа во тимот на Видиниќ во период од неколку месеци, Колев редовно беше дел од тимот на КМФ Бутел во нивните битки во футсал лигата на Македонија, па во еден момент беше поврзуван и со можен трансфер во Шпанија. Анел Курт на 8.11.2023 на натпреварот со Шеча го одигра својот 300 натпревар за Бутоп со што стана четвртиот член на елитниот клуб 300 каде се уште и Костовски, Смиљковски и Каравидов. Зимските подготовки се одржаа по 14. пат и траеја 20 дена, а нашите момци освен натпреварите и тренинзите имаа и повремени организирани дружења, како заедничкото присуство на натпреварот од квалификациите за Европското првенство меѓу Македонија и Италија на Градскиот стадион во Скопје.

Во делот на индивидуалната статистика ќе почнеме со вкупниот број на играчи кои настапија – 26, што е во рамките на востановената практика од претходните три сезони (25 и два пати по 27). Во тимот на сезоната се најдоа три исти играчи како и лани: Костовски (на позицијата голман) со 13 настапи, Курт со 16 настапи и Смиљковски со 12. Вистинско освежување годинава беше тандемот кој ни пристигна од Сент Патрик, Чаковски (кој има најмногу настапи сезонава од сите играчи, 18) и Волчевски (12 настапи) кои заедно со Димитровски (15 настапи) го комплетираат тимот на сезоната. Двоцифрен беше уште и Велковски со 11 настапи, а потоа следат Вучевски со 8, Вангеловски со 7, Каравидов со 6 и Амар Вукељ со 5 настапи. Тројца играчи настапија по два пати: Жерновски, Колев и Желка, а дури 12 играчи запишаа по еден настап: Васил, Ристе Валчанов, Омер, Муки, Кристијан Димовиќ, Бесим Кики, Раим Демир, Фатмир Зука, Никола Џон, Ерман, Ристе Кичовски и Глигоров Алек. Во посебна објава ќе презентираме повеќе детали за трката за златната копачка која овојпат ја поделија Марио Вангеловски и Столе Чаковски.

Работата и функционирањето на веб-страницата и понатаму не позиционира како еден од најтранспарентните професионални или аматерски клубови во земјата. Оваа година имавме 107 објави, што е втора најдобра бројка зад рекордните 128 од претходната 2022/2023 сезона, а пред 103-те објави од сезоната 2020/2021. По месеци почнувајќи од јули 2023 бројот на објави изгледаше вака: 5, 2, 15, 14, 13, 2, 5, 11, 14, 15, 7 и 4. Истовремено продолживме со уредување на фејсбук страната на Маалска лига со навремени известувања и објави за сите резултати, распореди и новости. На почетокот на јуни беше продолжена лиценцата за дополнителни 365 дена. Токму во делот на веб страницата ви најавуваме дополнително освежување и збогатување на содржините за време на овие летни месеци, но и во текот на целата сезона.

Финансиското работење за изминатата сезона би можеле да го наречеме и повеќе од домаќинско затоа што трошоците достигнаа само 11500 денари, многу помалку споредено со претходните три сезони на пример (22000, 23000, 23500). Само еднаш сме потрошиле помалку пари откако ја водиме оваа статистика и тоа во сезоната 2017/2018 со потрошени 7000 денари.

Веќе се работи на плановите за наредната сезона во која се надеваме дека конечно ќе дојдеме и до нов трофеј, но и до повеќе одиграни натпревари. Во фокусот останува развојот на Маалската лига и на онлајн платформите на Бутоп и МЛ, како и заштитата на овие брендови. Меѓу другото, извесно е дека ќе имаме инвестиции во нова опрема и во општествено одговорни активности. Во план е и организирање на неколку тим-билдинг настани и учество на турнири и натпревари во странство.

Спортски поздрав,

Дарко Костовски

Денес својот роденден го прославува Кристијан Велковски. Популарниот Кико досега настапи на 150 натпревари на Бутоп, а од пред неколку сезони ја носи десетката на својот грб. Во два наврати беше златна копачка на нашиот тим, во сезоните 2014/2015 и 2017/2018. Му посакуваме уште многу успеси во синиот дрес, но и на приватен план.

Среќен роденден Кико!

Пред неколку дена во Германија започна седумнаесеттото европско првенство во фудбал кое цел месец ќе им понуди уживање на навивачите низ континентот. Ние ќе го искористиме овој момент да се потсетиме на натпреварите кои Бутоп ги има одиграно за време на големите фудбалски натпреварувања: светските и европските првенства.

Нашето деби на едно светско го имавме во 2010 година кога во периодот од 20 до 30 јуни настапувавме на турнирот „Дарко Брњарчевски“ во скопско Волково. Почнавме со три нерешени против Флексо принт, Рандом и Гладијатори, натпревари кои се играа во салата „Христо Батанџиев“. Потоа следеше еден натпревар на теренот „Бранители“ и пораз од Виса, по што до крај турнирот се врати на првичното место на одигрување, а Бутоп со победи над Клошари и Фабер СЦГ и пораз од XXL за крај на настапот на овој турнир со вкупен скор 2 победи, 3 нерешени и 2 порази.

За две години следеше Европското првенство во Полска и Украина, а Бутоп во периодот од 11 до 22 јуни настапуваше на два турнира. Најпрво во Железара каде остваривме една победа (против Бед бојс) и два порази (против Авто морал Ане и Ринија). Нешто подоцна учествувавме на турнир во градскиот парк каде забележавме два тесни порази од екипите на Ален и Гром.

По девет години пауза, за време на Европското првенство во 2021 година, одигравме еден натпревар (термин во балонот кај ОУ Пенко) кој го загубивме од тимот на Дарко ФФМ.

Вкупниот скор за време на големите фудбалски настани ни е 3 победи, 3 нерешени и дури 7 порази, што и не е баш за пофалба. Засега немаме најава за евентуален натпревар во периодот кој следи и збогатување на оваа статистика од нашата историја.

Денес Анел Курт го слави својот 32. роденден. Легендарната осумка на Бутоп досега запиша 307 настапи во синиот дрес, а меѓу неверојатните бројки и рекорди стои и податокот дека беше златна копачка за сезоната 2018/2019. Му посакуваме се најубаво на приватен и на професионален план! Среќен роденден Анел!

ФК Бутоп ја продолжи лиценцата за својата официјална веб-страница за наредните дванаесет месеци. Со ова го одржуваме континуитетот на една од најажурираните страни на спортски колективи во земјата и покрај фактот што сме аматерски (и нерегистриран) клуб. Оваа успешна приказна на Бутоп започна пред десет години, во септември 2014 г. Ветуваме дека и во наредниот период ќе работиме професионално и ревносно во поглед на нашата достапност и транспарентност пред македонската спортска јавност.

Нашите фудбалери го добија цел месец мај за одмор од обврски кон клубот. Некои од нив сепак останаа активни играјќи термини со други тимови, но како по некоја традиција од последните неколку сезони во овој завршен дел од сезоната малку по малку го спуштаме ритамот пред летната пауза. Па така во 2019-та во мај сме одиграле еден натпревар, во 2020 ниту еден, во 2021 два. Мај 2022 е исклучок од правилото во последниве сезони затоа што сме одиграле пет натпревари, додека пак лани во 2023 повторно само еден натпревар.

Ристе Валчанов вчера (23.05.) го прослави својот роденден. Валчанов последните неколку сезони беше редовен член на поставата на Бутоп и досега собра 54 настапи во синиот дрес. Во моментов живее и работи на Малта. Му посакуваме се најубаво во кариерата и на приватен план. Среќен роденден Ристе!

Маалската лига во мал фудбал пред два дена ја објави вечната табела како и листата на стрелци по одигрувањето на четвртата сезона. Бутоп се зацврсти како втор на табелата откако оваа сезона за првпат имавме позитивен скор од 6 победи, 1 реми и 3 порази. Вкупниот учинок сега на 40 натпревари ни е: 15 победи, 5 нерешени и 20 порази со гол разлика 222-238. Листата на стрелци ја предводат нашиот Марио Вангеловски и играчот на Лукс кафе Бљертон Селими со по 48 постигнати голови. Двајцата позајмени играчи од Сент Патрик Чаковски и Волчевски истотака се најдоа на листата со 33 (7 место), односно 24 (14 место) погодоци. Курт и Велковски со по 21 гол се најдоа на делба на 19 место, а Димитровски со 20 гола е на делба на 22 место.

ФК Бутоп на сите православни верници во Македонија им го честита најголемиот христијански празник Велигден. Христос воскресе! За многу години!

Маалската лига на својот профил на фејсбук изминативе денови ги објави сите резултати, табели, статистика, наградени играчи и тимови и фотографии од Сезона 4 која заврши пред десетина дена. Веќе традиционално, по доделувањето на пехарите беше направена и заедничка фотографија со играчи од неколку екипи.