Archives

Вчера нашите момци со пораз ја започнаа новата сезона во Маалската лига. Конечните 6-11 во дуелот со Таверна Шкупи се реален приказ на случувањата на теренот. Бутопци одржуваа егал во првите петнаесетина минути, но пред крајот на полувремето противникот дојде до плус два и веднаш стави до знаење дека неизвесност нема да има. За нас по два гола постигнаа Столе Чаковски и Амар Вукељ, а по еден гол дебитантите Васил и Омер. Настапија и Волчевски и Костовски, кој бранеше. Во останатите средби победи забележаа Алиенс (5-0) против АММ-Тим, Дрим тим (13-8) против Албајрак Тенда и Ак. Ќерим (7-5) против Шеча.

Конечно дојде денот за почеток на новата сезона на нашиот тим, седумнаесетта во историјата. Воедно, вечерва од 19:00 часот ја отвараме третата сезона на Маалската лига со дуелот против Таверна Шкупи. За жал, тимот е разретчен затоа што ниту еден од првотимците не може да настапи. Се надеваме дека резервистите и играчите кои се јавија на позајмица ќе можат да пружат достоен отпор на силниот противник.

Вчерашната ждрепка одлучи Бутоп во првото коло на Маалската лига да се сретне со старите познаници, овојпат во тимот на Таверна Шкупи. Секако, познати се имињата и на останатите шест противници: Алиенс, Ак. Ќерим, АММ-Тим, Дрим тим, Албајрак Тенда и Шеча. Засега нема доволно информации да може да се издвојат фаворитите, па можеби ова ќе биде најизедначената сезона досега, времето ќе покаже.

Бутоп во четврток ќе ја има честа да ја отвори третата сезона на Маалската лига со дуелот против Таверна Шкупи кој е прв на програмата и е закажан во 19:00 часот. Ова сепак е тим кој ни е многу добро познат бидејќи поголемиот дел од играчите го сочинуваа Лукс кафе, па можеби станува збор само за промена на името на тимот. Ждрепката беше одржана денес, а форматот на натпреварувањето останува ист како во претходната сезона, со осум тимови и десет кола на програмата.  

Уште само три дена не делат од почетокот на новата, седумнаесетта сезона на ФК Бутоп. Како што најавивме, овој четврток се игра првото коло од третата сезона на Маалската лига, а противникот и комплетниот распоред би требало да бидат познати утре за кога е закажана ждрепката.

ФК Бутоп денес полни 16 години. На денешен ден, 15 септември 2007. година започна приказната на нашиот тим кој низ годините прерасна во препознатлив бренд на скопската фудбалска мапа. Нека ни е среќен роденденот и нека биде оваа сезона исполнета со многу успеси!

Маалската лига во мал фудбал на својата официјална фејсбук страна денес објави дека почетокот на третата сезона ќе биде на 21 септември, наредниот четврток. Тоа значи дека Бутоп и другите екипи учесници имаат уште само осум дена да се подготват за битките кои ќе го дадат новиот шампион во ова натпреварување. Актуелен освојувач на трофејот е Љуботенски пат.

Вчера започна новата, 13-та сезона во Бизнис лигата на Македонија во која за првпат учествува и тимот на Корпа Мк за кој настапуваат нашите Анел Курт и Кристијан Велковски. Како и што се очекуваше, тие веднаш покажаа дека ќе бидат лидери во екипата и беа стрелци на двата гола во поразот (2-7) од одличниот тим на Уника предводен од Арбен Нухиу. Им посакуваме успех на нашите момци во ова натпреварување!

Кога го прашавме Анел дали ќе бидат подготвени за борби на два фронта ако знаеме дека Бутоп многу скоро ќе почне со настапите во Маалската лига, тој потврди: „Апсолутно! Максимално сме подготвени за сите предизвици“.

Фудбалерите на Бутоп испратија мини делегација на натпреварот на нашата А репрезентација против европскиот шампион Италија завчера на Националната арена „Тодор Проески“ во Скопје. Нашите момци како и секогаш дадоа поддршка за националите кои изборија реми (1-1), а среќа им посакуваме и на утрешното гостување на Малта. Елиф Елмас, кој во минатото оствари и четири настапи за Бутоп, повторно имаше забележителен настап во најновиот успех на Македонија.

ФК Бутоп на сите наши граѓани им го честита денешниот празник 8 Септември, Денот на независноста на Република Македонија. За многу години!