September, 2023

Вчера започна новата, 13-та сезона во Бизнис лигата на Македонија во која за првпат учествува и тимот на Корпа Мк за кој настапуваат нашите Анел Курт и Кристијан Велковски. Како и што се очекуваше, тие веднаш покажаа дека ќе бидат лидери во екипата и беа стрелци на двата гола во поразот (2-7) од одличниот тим на Уника предводен од Арбен Нухиу. Им посакуваме успех на нашите момци во ова натпреварување!

Кога го прашавме Анел дали ќе бидат подготвени за борби на два фронта ако знаеме дека Бутоп многу скоро ќе почне со настапите во Маалската лига, тој потврди: „Апсолутно! Максимално сме подготвени за сите предизвици“.

Фудбалерите на Бутоп испратија мини делегација на натпреварот на нашата А репрезентација против европскиот шампион Италија завчера на Националната арена „Тодор Проески“ во Скопје. Нашите момци како и секогаш дадоа поддршка за националите кои изборија реми (1-1), а среќа им посакуваме и на утрешното гостување на Малта. Елиф Елмас, кој во минатото оствари и четири настапи за Бутоп, повторно имаше забележителен настап во најновиот успех на Македонија.

ФК Бутоп на сите наши граѓани им го честита денешниот празник 8 Септември, Денот на независноста на Република Македонија. За многу години!

Денес Кирил Смиљковски го слави својот 31. роденден. Кире е еден од основачите на Бутоп и негова легенда со која се поврзани бројни рекорди. Помеѓу останатото, освојувач е на златната копачка во сезоната 2015/2016 и е еден од тројцата играчи кои ја надминаа границата од 300 настапи. Му посакуваме се најубаво на приватен и на професионален план.

Среќен роденден Кире!

Деновиве почнаа преговорите за новата сезона на Маалската лига со сите чинители кои треба да бидат дел од организацијата, а во преден план се секако и тимовите кои сакаат да учествуваат. Очекуваме третата сезона да започне некаде во втората половина на овој месец, но се уште ги немаме точниот датум и останатите детали околу самиот формат на натпреварувањето. Улогата на Бутоп како основач на оваа лига е од огромна важност за нејзиниот напредок, а истовремено мораме да се обидеме во еден кус временски период да ја подигнеме натпреварувачката форма и спремни да ги дочекаме предизвиците кои не чекаат во оваа силна конкуренција.