АКТУЕЛНОСТИ

Љубителите на малиот фудбал утре (13.10.2022) со почеток во 20:20 часот ќе можат да го проследат бутелското дерби во рамките на четвртото коло на Маалската лига помеѓу екипите на ЗОО Арт и Бутоп. Момците од Бутел 2, кои се номинален домаќин на оваа средба, во претходното коло во натпреварот против Алиенс ја остварија првата победа, додека пак ние го освоивме првиот бод во трилерот со водечкиот тим на табелата Белиот мачор. Ова е знак дека формата на двете екипи е во нагорна линија и навивачите утре може да очекуваат вистински спектакл. Во останатите средби, Белиот мачор и Лукс кафе како лидери на табелата ќе се борат за самиот врв (почеток во 19:30), а последниот термин (21:10) е резервиран за Радишани и Алиенс.

Марио Вангеловски стана првиот играч на Бутоп кој постигнал пет гола на турнирски или лигашки натпревар откако пред четири дена на средбата со Белиот мачор имаше фантастично издание и испука петарда во противничката мрежа. Тој истотака стана првиот со ваков подвиг во рамките на Маалската лига. Нашата златна копачка од сезоната 2016/2017 со ова најави успешна сезона и можеби рушење и на други рекорди. Претходно само двајца наши играчи имаа постигнато по четири гола на една средба од турнирски карактер: Анел Курт на 20.09.2008 против Турци ЈБТ во Железара и Кирил Смиљковски на 21.05.2018 против Гоце 2000 во Добри дол.

Бутоп приреди изненадување на вчерашниот натпревар во рамките на третото коло на Маалската лига ремизирајќи со тимот на Белиот мачор. Конечните 7-7 ни го донесоа првиот бод иако никој не очекуваше ваков расплет пред почетокот. Бутопци се појавија со само пет играчи: Костовски поради повреда во улога на голман, Каравидов, Вангеловски, како и двете засилувања од ланскиот ривал Немилосрдни, браќата Амар и Анес Вукељ. Нашите ривали покажаа спортски ферплеј бидејќи одлучија и тие да играат 4+1 и покрај тоа што имаа доволно играчи, а се борат и за врвот на табелата. Белиот мачор брзо дојде до солидно водство (1-4), но нашите момци одлучија да не се предадат и до крај да се држат до зацртаната тактика: фокус на одбраната со низок блок и повремен посед со голман-играч и полуконтри со Вангеловски како сидро, а Амар со уфрлувања од втор план. Резултатот беше целосен резултатски пресврт и наше водство (7-5) на шест минути до крајот, кое сепак не успеавме да го задржиме во финалниот налет на радишанци. На крајот двете екипи можат да бидат задоволни, Бутоп го освои првиот бод, а Белиот мачор и покрај ремито изби на лидерската позиција на табелата.

Поминаа точно 14 години (04.10.2008) од денот кога Бутоп го освои единствениот трофеј во досегашната историја. Тоа беше остварено на игралиштето на ОУ Григор Прличев во населба Железара во финалето на турнирот, против Турци ЈБТ. Конечниот резултат беше 6-3, а за освоениот турнир нашите играчи ја поделија наградата од 2400 денари.

Бутоп забележа уште еден тежок пораз во рамките на второто коло на Маалската лига, и тоа на својот јубилеен 400 натпревар. Вчеравечер (29.09.2022) Алиенс беа поуспешни со конечни 10-3. Интересно е што резултатот на полувремето беше 6-1, идентично како во првото коло против Лукс кафе, а тогаш на крај беше 11-3. Бутопци вчера поведоа на почетокот, но потоа со два гола од корнер дозволија противникот да го сврти натпреварот и враќање немаше. За нас настапија Колев, Курт, Смиљковски, Велковски, Костовски и Вангеловски во стартниот состав, а подоцна влезе и Каравидов.

Бутоп утре ќе го одигра 400-иот натпревар во својата историја. Наш противник ќе биде тимот на Алиенс, а оваа средба ќе го заокружи второто коло во Маалската лига. Почетокот е закажан за во 21:10.

Денес беше објавен новиот распоред за наредните четири кола во Маалската лига. Бутоп во второто коло кое се игра овој четврток (29.09.2022) ќе ги брка првите бодови во натпреварот со Алиенс. Средбата започнува во 21:10.

Бутоп забележа убедлив пораз на стартот на Маалската лига откако вчера (22.09.2022) беше разбиен од Лукс кафе со конечни 11-3. Двете екипи кои се на некој начин основачи на оваа лига одиграа нерамноправен натпревар во кој домаќинот доминираше од почеток до крај, а на полувремето имаше убедливи 6-1. Бутопци својата шанса за први бодови ќе ја бараат во наредното коло.

Бутоп вечерва во 20:20 часот во балонот кај ООУ „Рајко Жинзифов“ ќе го има својот премиерен настап во Маалската лига против тимот на Лукс кафе. За Бутоп вечерва се најавени: Колев (1), Костовски (4), Смиљковски (7), Курт (8), Каравидов (11), Грмуш (12) и Вангеловски (40). Она што привлекува најмногу внимание е фактот дека двајца голмани се пријавени за настап. Според најавите, Грмуш ќе биде на голот, а Коки ќе се воигрува и ќе настапи во поле како играч.

Утре започнува првото издание на Маалската лига, а во првото коло Бутоп ќе игра против тимот на Лукс кафе. Од второто до петтото коло силите ќе ги одмериме со тимовите на Алиенс, Радишани, Белиот мачор и ЗОО Арт. Натпреварите се играат секој четврток. Вака изгледа комплетниот распоред: