АКТУЕЛНОСТИ

Бутоп вечерва (11.11.2021) за првпат ќе игра на теренот кај СУГС „Никола Карев“ против старите познаници Дарко ФФМ. Натпреварот почнува во 22:00 часот. Во нашиот состав денес ќе се најдат: Матеј, Костовски, Валчанов, Курт, Велковски, Каравидов и Даниел.

Нашата управа закажа термин на теренот на СУГС „Никола Карев“ за утре (11.11.2021) во 22:00 часот. Противник треба да ни биде тимот на Дарко ФФМ, но чекаме официјална потврда во текот на утрешниот ден. Тоа треба да биде наш прв натпревар на овој терен. Повеќе информации утре, следете не.

Бутоп забележа нова победа во натпреварите против Дарко ФФМ откако синоќа (04.11.2021) беше поуспешен од стариот познаник со конечни 10-8. Средбата помина во еден опуштен ритам со отворена игра и резултатски пресврти. Судиите пружија достоен отпор, но нашето искуство надополнето со младите сили беше пресудно за конечниот епилог. За Бутоп настапија дебитантот Енис Каришиќ, Курт, Велковски, Валчанов, Шилегов и Даниел. Натпреварот се одигра на теренот од балонот кај ОУ 11 Октомври во населба Пролет со почеток во 22:10.

Насловот сам говори за тоа за каде се договоривме да се одигра денешниот термин со тимот на Дарко ФФМ. Населбата Пролет и балонот на ОУ 11 Октомври одново ќе бидат боиште за овие две екипи, натпреварот почнува во 22:10. За Бутоп ќе настапат: Енис Каришиќ, кој ќе дебитира и ќе започне на голманската позиција, како и Курт, Велковски, Шилегов, Валчанов и Даниел.  

Денешниов ден донесе интензивни преговори со екипата на Дарко Видиниќ за одигрување натпревар утре (04.11.2021). Сепак, кратко е времето за да се најде термин кој би одговарал на двете екипи, како и да се соберат играчи. Повеќе информации за конечното решение и евентуалниот натпревар ќе добиете утре најдоцна до 16:00 часот.

Натпреварот кој денес требаше да го играме против Немилосрдни беше откажан три часа пред неговиот почеток. Двете екипи имаа кадровски проблеми и недоволен број на играчи, па моравме да се одлучиме на еден ваков непопуларен потег. Освен тоа, од менаџментот на балонот кај Зеф Љуш ни беше наложено дека доколку не играме ни остануваат две опции, а тоа е да се плати терминот, или тој да биде избришан. Поради финансиски причини и евентуалниот непотребен трошок, се одлучивме за втората опција.

Екипите на Бутоп и Немилосрдни вчера (07.10.2021) одиграа уште еден неизвесен натпревар, кој беше решен во самиот финиш со минимална победа за нас, 8-7. Бутопци имаа контрола врз резултатот во текот на целата средба, иако дозволија противникот да се понадева на позитивен исход при крајот. Сепак, пресуди искуството на нашите момци кои останаа со ладни глави во клучните моменти. Немилосрдни одиграа практично и ги казнија нашите непотребни излети, па реализираа неколку контри, но недоволно за реми. За Бутоп настапија играчите кои ги најавивме вчера, а Дритон Палоши како повратник по подолго време во тимот имаше огромен придонес во победата.

Вечерва нашите момци ќе ја употребат старата добра тактика со голман играч на натпреварот против Немилосрдни, кој ќе се одигра во веќе редовниот термин во Зеф Љуш, од 21:00 часот. Ова значи дека ќе немаме постојан голман, туку шест играчи кои ќе се менуваат на позицијата еден во текот на средбата. Единствената кадровска промена од претходниот натпревар е токму отсуството на Грмуш поради повреда на грбот, а на негово место е Дритон Палоши, кој е играч во поле. Останатата петорка ја сочинуваат Анел, Кико, Каро, Зеко и Даниел.

Пред 13 години и 2 дена (04.10.2008) Бутоп ја освои засега единствената титула. Тоа се случи на (тогаш) асфалтното игралиште кај ОУ Григор Прличев во населбата Железара. Во последниве години се повеќе игралишта имаат тревната подлога, па ист е случајот и со ова игралиште. Сепак, нашите почетоци беа главно на бетонските терени во Бутел 1, Бутел 2, Радишани, Железара, како и на летните турнири. Не е случајно што тврдите подлоги ни носеле многу успеси, иако сега ги избегнуваме поради многубројните хронични повреди на нашите фудбалери.

Денеска нашиот капитен и еден од основоположниците на идејата Бутоп, Дарко Костовски, го слави својот 29ти роденден. На нашиот Иниеста, кој за Бутоп одигра ххх натпревари и ужива во статусот жива легенда, сите соиграчи му посакуваат многу среќа и успех на сите полиња и што поскоро да се врати во препознатливата форма по тешката повреда. Среќен роденден Костовски.