АКТУЕЛНОСТИ

Вечерва во балонот кај Рајко Жинзифов беше одржана ждрепката за натпреварите во Маалската лига и шесте тима учесници го дознаа распоредот за воведните пет кола. Бутоп, кој се јавува како иницијатор, но и учесник во ова ново аматерско натпреварување во првото коло (четврток, 22.09.2022) игра во ударниот термин од 20:20 против Лукс кафе, искусниот тим на Фатмир Зука. Во останатите две средби ги имаме и локалното дерби Белиот мачор – Алиенс и Радишани – ЗОО Арт.

Тимот на Гостилница Кај Џек е освојувач на турнирот во Љубанци кој заврши синоќа откако во финалето беа поуспешни од Манто 2013. Тие освен што се впишаа во историјата на еден од најстарите турнири во мал фудбал во Скопје, ја собраа и наградата за првопласираниот тим од 200 000 денари. Во битката за третото место Гранд Слот Казино го победи тимот на ММ Ител. Годинава Бутоп имаше своевиден камбек на овој турнир по пауза од осум години и настапи како Аква Вардар коп Бутоп, а краен дострел беше групната фаза со скор од една победа и четири порази.

Во моментов се одвиваат завршните подготовки за почеток на Маалската лига во мал фудбал која треба да започне овој четврток (22 септември). Форматот на натпреварувањето предвидува десет кола во кои шест екипи ќе играат во двокружен систем, секој со секого по два пати, а конечниот збир на бодови по одигрувањето на последното коло некаде кон крајот на ноември ќе го даде шампионот. Досега пријавени се пет екипи. Откако ќе се дознае и последниот учесник, имињата на тимовите ќе бидат објавени, а потоа следи и ждрепката. Балонот кај ООУ Рајко Жинзифов во Топанско поле ќе биде местото каде ќе се играат натпреварите и таму веќе неколку дена трае реконструкцијата на дел од кровот и просторот околу теренот.

Денес Бутоп одбележува петнаесет години од своето формирање. 15 септември 2007 година беше денот кога започна оваа успешна приказна на клубот кој се обидува да биде на браникот на суштинските вредности на фудбалот и да промовира чесност, витештво и љубов кон убавата игра. Бутоп ги спои наративите на момците од Бутел 1 и Топанско поле кои беа дел од тој прв натпревар во тоа септемвриско попладне, а ова се гледа и во самото име на тимот. Низ сите овие години беа постигнати многу значајни резултати на теренот, но и надвор од него. Неблагодарно и тешко е сега да се издвои нешто од безбројните дружби, турнири и патувања, па само ќе се задржиме на статистичкиот податок дека до денес сме одиграле 398 натпревари, што значи блиску сме и до уште еден јубилеј. Како по обичај, Бутоп продолжува со своите заложби да ги зближува маалските екипи и да става акцент на уличните фудбалски мајстори и оттаму идејата за Лигата која ја промовиравме вчера, а за која ќе читате наредниов период. Сега останува само да си посакаме уште многу успеси и победи и во иднина. Среќен роденден Бутоп!

Со големо задоволство ви ја пренесуваме веста дека конечно по речиси цела година стигнавме од идеја до реализација на лигата во мал фудбал чии иницијатори бевме уште лани. Маалската лига ќе има за цел да ги собере фудбалските вљубеници на едно место и да понуди квалитетен фудбал и дружење за сите. Повеќе информации ќе може да прочитате наредниве денови, а сега ви го претставуваме официјалното лого на лигата.

Денес Кирил Смиљковски го слави својот триесетти роденден. Фудбалскиот романтичар и легенда на ФК Бутоп досега собра 289 настапи за нашиот тим, а златната копачка ја освои во сезоната 2015/2016. Му посакуваме се најдобро на приватен и на професионален план и уште многу успеси во синиот дрес.

Среќен роденден Кире!

ФК Бутоп на сите граѓани на Република Македонија им го честита денот на независноста, 8 Септември. Нека е за многу години!

По загубените шанси за прогрес во нокаут фазата, Аква Вардар коп Бутоп својот настап на овогодинешниот турнир во Љубанци го заврши со службен пораз од 3-0 од екипата на Орбита компани во неделата на 04.09.2022. Нашите момци не успеаја да се екипираат и тоа беше единствениот можен исход бидејќи групната фаза се комплетираше истиот ден и немаше опција за одложување. Со ова ние го заокруживме нашиот камбек на овој турнир по осум години пауза, а крајната оценка веројатно би требало да биде неуспех затоа што не беше остварена целта да се помине групата. Сепак, треба да се напомене дека ниту еднаш не успеавме да се собереме во полн состав и се уште не бевме сто проценти подготвени за игра на највисоко ниво. Радува победата против Пица до дома како и отпорот кој го прикажавме во одредени моменти и против фаворитите во нашата група. Сето тоа дава надеж за поуспешно продолжение на сезоната. Позитивен момент беше и соработката со спонзорот Аква Вардар коп и принтањето на новата гарнитура бели дресови, од кои направивме дури седумнаесет.

Пропаднаа сите шанси за Аква Вардар коп Бутоп да ја мине групната фаза на турнирот во Љубанци откако последните два резултати на другите натпревари во нашата група ја скроија нашата судбина. Најпрво завчера Пица до дома ги изненади Дар Мар (4-1), а тие денес се вратија со победа против Орбита компани (3-2), па сега познати се четирите патници во 1/16 финалето: Војводи Тетово, Жиле плин, Дар Мар и Пица до дома. Утрешниот натпревар кој треба да го одиграме со Орбита компани (18:30 часот) е борба за петтото место на двете екипи кои својот настап го завршуваат утре.

Последниот натпревар за бутопци во групата 5 кој требаше да го одиграме денес против тимот на Орбита компани е одложен поради дождот кој го зафати нашиот град. Веќе неколку дена временските услови се проблем за организаторот. Ние чекаме дополнителна информација за новиот распоред по што ќе бидете навремено известени за терминот на одигрување на оваа средба.