АКТУЕЛНОСТИ

Четвртата сезона на Маалската лига треба да започне овој четврток (29.02.2024). Оваа вест денес беше објавена и на официјалната фејсбук страница на ова натпреварување. Тоа значи дека имаме уште само три дена да се екипираме за новиот предизвик. Деновиве очекувајте повеќе информации за тоа како ќе изгледа Маалската лига, но и тимот на Бутоп во претстојната Сезона 4.

Нашите момци забележаа нов пораз во вчерашниот натпревар со Ак. Ќерим кој заврши 9-12. Бутоп имаше лош старт на средбата па негативата се искачи до минус шест (2-8), но подоцна успеа да се врати на само гол разлика (8-9). Сепак, нашиот противник го издржа налетот на момците во сино и дојде до заслужена победа. Бутоп настапи во доста изменет состав со три засилувања: Бесим, Раим и Фатмир Зука, а од стандардните играа Курт, Димитровски и Амар Вукељ.

Бутопци вечерва (21:00) ќе се обидат да ја остварат првата победа во 2024 година во натпреварот против Ак. Ќерим. По двонеделната пауза и болниот пораз од Бутел (Илхан) ова ќе биде шанса за рехабилитација, но и воигрување пред новите борби во Маалската лига, за чиј почеток повеќе информации очекуваме овие денови.

Денес својот 31 роденден го слави Кристијан Каравидов – Каро. Со Бутоп е од самиот почеток и е вистинска легенда на клубот. Досега запиша 306 настапи и во три наврати ја освојуваше златната копачка, во сезоните 2012/2013, 2020/2021 и 2021/2022. Му посакуваме се најубаво. Среќен роденден Каро!

Денес завршија дваесетдневните зимски базични подготовки на Бутоп. Нашите момци воглавно тренираа индивидуално, а одиграа и еден натпревар – оној минимален пораз од Бутел Илхан Р. Сега претстои период во кој ќе се обидеме да влеземе во натпреварувачки ритам со повеќе фудбал, но и да се подготвиме за новата сезона во Маалската лига чијшто почеток планираме да биде некаде на крајот на месецов.

Бутоп ја започна 2024 година и пролетната полусезона со минимален пораз (7-8) од Бутел Илхан Р. Нашите момци воспоставија контрола на играта и резултатот од самиот почеток и имаа водство (4-0). Ништо не се промени ни во продолжението и се чинеше дека победата е извесна, но не беше така. По неколку наши грешки во последните десетина минути противникот се врати во игра (6-5). Ние на пет минути пред крајот се вративме на плус 2 (7-5), но следеше тензичен финиш во кој не се снајдовме добро и откако Бутел Илхан за првпат дојдоа до егал (7-7), последниот наш напад беше пресечен за контра и победнички гол на црвените.

Бутоп вечерва во 21:00 часот (балон Албион, кај ОУ Пенко) ја отвара пролетната полусезона, а прв противник ќе ни биде тимот на Бутел Илхан Р. Оваа екипа е наш стар познаник, а првиот меѓусебен дуел е од далечната 2008 година кога на 12 јануари победивме 6-5 на теренчето кај Полицијата во Бутел. Во таа сезона одигравме 4 натпревари со позитивен скор за нас, 3-1 во победи. Следниот натпревар и повторно наша победа дојде во 2013 година. По неколку години пауза, патиштата повторно ни се вкрстија во сезоната 2020/2021 кога на четири средби нашиот вечерашен противник оствари исто толку победи и ја сврте традицијата во своја корист. На почетокот на наредната 2021/2022 сезона (29.08.2021) се одигра последниот натпревар во кој повторно момците на Илхан беа поуспешни со 10-5. Вкупно имаме 4 победи и 6 порази во 10 средби, а во серија сме од 5 порази, што значи многу незгоден противник за нас на почетокот на новата година.

За Бутоп вечерва ќе настапат Костовски, Курт, Велковски, Чаковски, Волчевски и Амар Вукељ.

Веќе дванаесет дена траат подготовките на бутопци и за целиот овој период нашите момци тренираа индивидуално, секој според своите потреби и ниво на подготвеност. Сепак, вистинското допрва следува, а на задоволство на сите наши фанови доаѓа информацијата дека утре Бутоп конечно се враќа во натпреварувачки ритам по долгата пауза од речиси три месеци без одигран натпревар. Противник ќе ни биде стариот познаник, екипата на Бутел Илхан Р. Повеќе за овој меч ќе прочитате утре. Засега знаеме дека почетокот е од 21:00 часот.

Вообичаено на 28 јануари Бутоп има двојна причина за славење затоа што две наши легенди токму на овој датум ги имаат своите родендени. Харис Фекиќ и Костадин Колев се членови на клубот 100 и оставија длабока трага со своите настапи за Бутоп низ годините. Среќен роденден Коки и Харис!

Бутопци утре (25.01.2024) ги започнуваат четиринаесеттите зимски подготовки. Традицијата која започна во 2011 година секогаш служи како една база за предизвиците кои ги носи пролетниот дел од сезоната. Првиот собир и тренинг утре ќе се одржат на старото теренче за мал фудбал во дворот на ОУ Живко Брајковски во Бутел со почеток во 15:30.