АКТУЕЛНОСТИ

Фудбалерите на Бутоп вчеравечер (14.03.2024) не дозволија израмнување на негативниот рекорд од шест порази по ред и го победија тимот на Ак. Ќерим во натпреварот од третото коло на МЛ. Конечниот резултат 6-4 дури и не ги отсликува случувањата на теренот затоа што нашите момци имаа резултатска контрола и комотна предност до самиот крај. Водството од 6-1 се стопи во последните две-три минути, но секако победата не беше доведена во прашање. За Бутоп настапија Каравидов (почна на голот, а потоа играчите се ротираа на таа позиција), Волчевски, Вучевски, Вангеловски, Димитровски и Чаковски.

Вечерва во 21:45 бутопци ќе му излезат на мегдан на тимот на Ак. Ќерим во обид да излезат од резултатската и играчка криза во која се наоѓаат. Во моментов сме во негативна серија од пет порази и евентуален нов неуспех би го израмнил клупскиот рекорд од шест последователни порази, кој датура уште од 2014 година. Овој натпревар е дуел на единствените две екипи кои не освоија ниту еден бод во првите две кола од новата сезона во Маалската лига.

Нов пораз за нашите момци во второто коло од МЛ остварен во четвртокот (07.03.2024) во натпреварот со АММ-Тим. Конечните 7-4 се донекаде реален резултат затоа што не бевме ниту до крај разбиени, но сепак доволно надиграни од расположениот противник. За Бутоп настапија Смиљковски, Каравидов, Вукељ, Вучевски, Волчевски, а на голот застана Колев.

Бутоп вечерва (07.03.2024) во 20:00 часот го игра својот натпревар од второто коло на Маалската лига, а противникот е добро познат, АММ-Тим. Во претходните две изданија на МЛ одигравме вкупно три натпревари со позитивен скор две победи и пораз. Денес на голот на Бутоп по подолго време ќе се врати Костадин Колев, а во составот најавени се и Курт, Смиљковски, Каравидов, Волчевски, Вучевски и Вукељ.

Вчера Јеткин Сезаир го прослави својот 31 роденден. Во фудбалските кругови популарно и со причина наречен Роналдињо, Јеткин долги години со успех го носеше дресот на Бутоп. Во два наврати ја освојуваше златната копачка (2009/2010 и 2010/2011) и собра 101 настап за нашиот клуб. Последниве години поради повреди не е во можност да помогне на фудбалскиот терен, а пред се е посветен на театарот. Му посакуваме се најубаво. Среќен роденден Јеткин!

Престапните години се посебни за нашиот поранешен голман Арбен Ејуп затоа што 29 февруари е денот на неговиот роденден. Оваа година популарниот Бени наполни 32 години. Тој беше наш голман на сезоната 2011/2012, а вкупно запиша 30 настапи за Бутоп. Му посакуваме се најдобро. Среќен роденден Бени!

Новата сезона во Маалската лига бутопци ја започнаа со пораз во вчерашниот (29.02.2024) натпревар со Лукс кафе (3-6). Конечниот резултат е донекаде реален исход на настаните на теренот. Играта во поголемиот дел беше израмнета со шанси на двете страни, но противникот знаеше подобро да ги искористи и заслужено да слави на крајот. За Бутоп настапија Смиљковски (како голман), Димитровски, Вангеловски, Чаковски, Волчевски и Боби Вучевски кој како позајмен играч дебитираше за нас.

Бутоп вечерва со Вангеловски во составот ќе ја стартува новата сезона во Маалската лига. Нашиот стар ривал, тимот на Лукс кафе, ќе има тешка задача во одбраната да го сопре популарниот Штака, но од друга страна бутопци се некомплетни поради отсуствата на Курт, Велковски, Костовски и Каравидов. Натпреварот започнува во 20:00 часот.

Маалската лига во претстојната Сезона 4 се враќа на системот со кој и почна во премиерното издание есента 2022. Тоа значи дека шест екипи ќе се борат за пехарот и титулата шампион на МЛ. Повторно како по некое непишано правило шампионот од претходната сезона нема да го брани тронот, па првите три освојувачи (Радишани, Љуботенски пат и Дрим тим) ќе добијат нов наследник од веќе познатите учесници во ова натпреварување: Алиенс, Бутоп, Лукс кафе, Ак. Ќерим, АММ-Тим и Албајрак Тенда.

Денес се одржа ждрепката за Сезона 4 на Маалската лига, а среќата сакаше на отварањето да играме дерби против тимот на Лукс кафе. Токму нашиот натпревар ќе биде прв на програмата в четврток и почнува во 20:00 часот.