АКТУЕЛНОСТИ

Како се доближува часот на вечерашната пресметка со Лукс кафе (21:00 часот) така се вжештува атмосферата во таборот на Бутоп. Голем е интересот за денешниот натпревар особено кога ќе се погледне моменталната табела, каде ние како третопласирани го напаѓаме тимот кој е едно место над нас. Токму затоа не треба да чуди фактот што дури осум наши играчи се пријавени во протоколот за денешниот дуел: Колев, Димитровски, Курт, Вучевски, Волчевски, Чаковски, Смиљковски и Вангеловски.

Утре (4.4.2024) почнува вториот дел од четвртата сезона на Маалската лига, а бутопци му излегуваат на мегдан на добро познатиот ривал, екипата на Лукс кафе (21:00 часот). Чаирчани беа подобри од нас во првото коло победувајќи со 6-3. Се чини дека утрешната средба освен можност за реванш претставува шанса со евентуална победа да добиеме многу во борбата за првите три места, додека пак пораз не би бил некаква трагедија затоа што повторно ќе имаме се во свои раце во преостанатиот дел од сезоната. Бутоп и Лукс кафе досега се среќаваа шест пати, а ние имаме негативен биланс од две победи и четири порази.

На точно половина од Сезона 4 на Маалската лига, Бутоп се наоѓа на третата позиција на табелата со две победи и три порази. Подобрата гол разлика од АММ-Тим е причината што сме едно место над нив, но блиску до нас се и Ак. Ќерим со четири, односно Алиенс со три освоени бода. Битката за титулата според досега прикажаното би требало да се води меѓу Албајрак Тенда и Лукс кафе. Повеќе од јасно е дека ако сакаме и на крајот да се најдеме меѓу трите најдобри ќе мора дополнително да го кренеме нивото на игра и да освоиме повеќе бодови во возвратните дуели со нашите противници. Вториот дел од оваа сезона почнува веќе в четврток кога играме против Лукс кафе. Во првото коло загубивме 6-3, па ова е шанса да се реваншираме за тој пораз. Кај индивидуалната статистика вреди да се спомне Вангеловски кој со девет погодоци е трет на листата на стрелците и може да се вмеша во борбата за признанието најдобар стрелец кое веќе еднаш го освои во премиерното издание на Маалската лига во есента 2022 година.

Лидерот во МЛ Албајрак Тенда сепак беше пресилен за Бутоп на завчерашниот натпревар од петтото коло кој заврши со конечни 4-7 во корист на нашиот противник. Нашите момци постојано се обидуваа да наметнат своја игра, но реално Албајрак држеше резултатска и играчка контрола во поголемиот дел од средбата па заслужено дојде до нови три бода. И покрај ова, резултатите од другите натпревари се наредија на начин што Бутоп напредуваше едно место на табелата и сега се наоѓа на третата позиција со ист број бодови како и АММ-Тим, кои се четврти. Во четвртокот за нас настапија Курт (како голман), Димитровски, Вучевски, Волчевски, Смиљковски, Вангеловски и Чаковски.

Вечерва со одигрувањето на петтото коло се заокружува првата половина од Сезона 4 на Маалската лига, а програмата ја затвараат нашиот Бутоп и лидерот на табелата Албајрак Тенда. Натпреварот е закажан за 22:25 часот, а бутопци осоколени по двете победи во претходните кола ќе сакаат да си ги испробаат силите против најдобриот тим досега. Затоа, оваа средба ќе ни даде јасна слика за тоа какви се реалните капацитети на нашиот тим за до крајот на оваа сезона. За Бутоп денес ќе настапат: Чаковски, Волчевски, Вучевски, Смиљковски, Димитровски, Курт и Вангеловски.

Вчера (26.03.2024) својот триесет и прв роденден го прослави Кирил Ѓорѓиев – Грмуш. Тој е неизоставен член на Бутоп од самите почетоци на клубот. Во четири наврати беше голман на сезоната (2007/2008, 2018/2019, 2019/2020 и 2021/2022) и досега запиша 44 настапи. Му посакуваме се најдобро. Среќен роденден Грмуш!

Како гром од ведро небо вчера низ бутелските фудбалски кулоари се прошири веста дека нашиот Костадин Колев договорил трансфер во футсал клуб од Шпанија. Оваа информација кружеше во текот на целиот ден и разбирливо предизвика доста интерес, па моравме директно да го исконтактираме Коки и да ви го пренесеме неговиот коментар за целата ситуација: „Нема ништо од тоа Даре! Чисти шпекулации. Јас сум играч на КМФ Бутел и не сум потпишал договор со ниеден друг клуб. И јас сум изненаден од тоа што го слушнав“. Низ понатамошниот разговор со Колев дознавме дека и претходно имало одредени лажни вести околу неговата иднина, но тој децидно ги отфрли сите како шпекулации.

Приказната која дојде до нас е дека менаџментот на КМФ Бутел преку свои врски во најфудбалската (футсал) земја во Европа издејствувал трансфер на Колев во екипа од Валенсија која настапува во пониските футсал рангови во Шпанија.

Костадин Колев шест пати по ред беше голман на сезоната на Бутоп почнувајќи од 2012/2013 до 2017/2018 и со 111 настапи е апсолутен рекордер на голманската позиција во нашиот клуб. Веќе долги години гради успешна кариера и во футсал лигата на Македонија настапувајќи за Шкупи, Арбен Бајрами и Бутел.

Вчерашниот натпревар против Алиенс во рамките на четвртото коло на МЛ донесе добар фудбал, но и многу тензија и позитивен исход за Бутоп, победа со конечен резултат 7-5. Нашите момци во поголемиот дел од средбата имаа минимална предност иако и противникот имаше што да каже на теренот. По неколку инцидентни ситуации помеѓу нашиот Вангеловски и најдобриот играч во лигата од минатата сезона Хасан, Алиенс одлучија на четири минути пред истекот на времето да се повлечат од теренот па така се регистрираше моменталниот резултат за конечен. За Бутоп на голот дебитираше Ерман, а имавме уште еден дебитант позајмен од Сент Патрик – Никола Џон. Настапија и Курт, Волчевски, Вучевски, Чаковски и Вангеловски.

Четврто коло во Сезона 4 на МЛ и четврти пат Бутоп ќе биде без замена на вечерашниот натпревар против Алиенс (21:00 часот). Уште една потврда дека периодов најголем проблем ни се отсуствата на играчите па едвај успеваме да собереме шестмина. Вечерва бутопци ќе играат во сина комбинација, а во составот ќе бидат Курт, Вангеловски, Чаковски, Волчевски, Вучевски и уште еден играч на позајмица од Сент Патрик.

Утре не очекува нова битка во Маалската лига. На програмата се средбите од четвртото коло, а во него Бутоп се среќава со својот стар познаник, тимот на Алиенс. Двете екипи се дел од лигата од нејзината прва сезона и ова практично е дерби на староседелците во МЛ. Досега пет пати игравме меѓусебе и скорот е изедначен, по две победи и едно реми. Како ќе биде утре ќе дознаеме по натпреварот чијшто почеток е закажан за 21:00 часот.